Unammisartutoqqap inuusuttut sapersippai
Qimussernermik tusaamasaq Ville Siegstad tupaallatsitseqqippoq Ilulissani qimussimik sukkaniunnermi nr. 2-ngorami.
Arlaannaataluunniit takutissimagunanngilaa 1970-ikkunniit ukiunut untritilinnut 2100-ukkunnut qimussimik sukkaniuttarnerni siuttunut ilaajuartarsimaneq. Taamaattumik isiginnaartut ataqqinningaarlutik 62-inik ukiulik Ville Siegstad apuunnerani tikilluaqquvaat, arfininngornermi martsip aallaqqaataani Ilulissani qimussinik sukkaniunneq ingerlanneqarmat. Sukkaniunneq aaqqissuunneqarsimavoq qimussertartut peqatigiiffiannit Qimussersaq-mit.
Sukkaniunnermi ajugaasuuvoq qimussimik sukkaniunnermi nunatsinni pissartaasimasoq Jørgen Kristensen, taassuma ingerlaarfik 27,2 kilometerinik isorartutigisoq, qaqqaq 400 meterinik portussusil9ik Akinnaq aqqusaarlugu kangerlummut ingerlasoq, piffiit ingerlaneranni qimussertartorpassuarnik tamaviaartitsisarsimaqisoq, akunneq ataaseq minutsillu 21,50-it atorlugit ingerlasimallugu.
Minutsinik pingasuinnarnik kigaannerulluni Ville Siegstad apuuppoq, taannalu qimussimik angusarpassuarisarsimasani pissutigalugit kattuffimmit, qimussimik nunatsinni pissartanngorniunnermik ingerlatsisartumit, Avannaatya Qimussersuanit, ataqqinaammik ilaasortaatinneqarpoq. Ville Siegstadip ingerlaarfik ingerlasimavaa akunneq ataaseq minutsillu 24,12 atorlugit.
Aalisartoq David Mathæussen normu 3-ngorpoq atorsimallugit akunneq ataaseq minutsillu 26,42.
Qimussimik sukkaniunnermi GM
Ilulissani sukkaniunnermi sukkanerpaat tallimaat Avannaata Qimussersuani, martsip 29-ianni Uummannami ingerlanneqartussami, peqataassapput. Tallimat, Ilulissaniit ingerlaqqittut tassapput:
- Jørgen Kristensen
- Ville Siegstad
- David Mathæussen
- Jakob Skade
- Karl Rosbach
Angusat pissarsiarisinnaavatit linki talerperleq toorlugu.