Amerliartornerat unitsippaat
Qeqertarsuarmi naartuersinnerit ikilerujussuarput, sulilu ikiliartorput.
Sulisut aalajangersimasut arnanik 15-iniit 45-nik ukiulinnik qanimut malinnaajuartut.
Pisariippasippoq, pimoorussisunilu iluatsippoq - soorlu Qeqertarsuarmi.
Kommuneqarfinnguami 100-t missaanni inulimmi naartuersinnerit 2003-mi amerleriapiloorput 26-iullutik.
Aappaaguani affaat sinnerlugit ikilipput aqqaniliinnanngorlutik, 2007-imilu naartuersittut arfineq-pingasuinnaapput.
Tamaalilluni Qeqertarsuaq illoqarfinni kisiartaalluni naalakkersuinikkut 2002-miit 2007-imut anguniagaq anguaa - siunniussaq naartuersinnerit affaannanngortinneqarnissaannik imalik.
Taama angusaqarneq pissuteqarpoq Qeqertarsuup peqqissaaviani aalajangertoqarsimammat naartuersinnerit ikilisassagaanni aalajangersimasumik, aalajaatsumik siunertalimmillu periaaseqartoqassasoq.
Malinnaaneq
Peqqinnissamik siammarsaasoq Marie Mølgaard Qeqertarsuup peqqissaaviani ernisussanik nakkutiginnittuuvoq, saniatigullu naartuersinnaveersaartitsineq akisussaaffigaa.
Sakkut pingaarnersaraat arnat 15-iniit 45-nut ukiullit tamaasa nalunaarsuiffeqartinnerat.
- Nalunaarsuiffinni arnat naartunaveersaarnerup tungaatigut aqqusaagaat allallu kinguaassiuutinut tunngasut tamarmik allattorneqartarput, taamaalillutalu arnat tamaasa qanimut malinnaaffigisinnaasarpagut, pisariaqaraangat siunnersuisinnaalluta oqaloqatiginnissinnaallutalu, Marie Mølgaard nassuiaavoq.
Peqqissaavimmi atorfillit tamarmik, nakorsat peqqissaasullu ilanngullugit, naartuersinnaveersaartitsinermi akuliusimapput.
Arnat nakorsiartut sunaluunniit nakorsiutigigaluarpassuk kinguaassiornermut tunngasut naartunaveersaarnerlu oqaluuserineqartarput, tamannalu iluaqutaasimavoq.
- Naartunaveersaarneq pilersarutaasumillu meeqqiorneq nalinginnaasutut isigineqartussatut eqqartortarpagut, pilersaarutaanngitsumillu naartulernissaq pinaveersaarniarlugu neqeroorutissaqartuarpugut. Aamma soorlu p-pillenik aallernissaq nakkutigisarparput, Marie Mølgaard oqarpoq.
- Inuit taamalillugit akisussaaffimmik arsaarneqarneq ajorpat?
- Naagga, pilersaarutaasumik iliornertut isigaarput, arnat angutillu oqaloqatigisarlugit suna naartunaveersaat taakkununnga pitsaanerunersoq, inersimasullumi arlallit meerartaaqqinnianngitsut steriliseeretittarput, Marie Mølgaard oqaluttuarpoq.
Sermitsiaq atuaruk...