IT kinguarsimasunut iluaqutassaaq
Kommunit suliniuteqarneratigut, ilaqutariit kinguarsimasunik ilaqutallit Nunani Avannarlerni avinngarusimasuniittut Internettikkut ikiorneqarsinnaanera piariingajalerpoq
Islandimi Socialdepartementet nunani allani NORA-regionimiittuni, Kalaallit Nunaat, Savalimmiut Norgelu, suliniut »Nunani avannarlerni kinguarsimasut inuunerminni atugaat«-nik taallugu ingerlanneqarpoq.
Nunani avannarlerni sumiffinni avinngarusimasuni peqqinnissaqarfimmi ilisimasaallit angujuminaassinnaasarput. Kinguarsimasunullu tunngatillugu aamma taamaattarluni. Tamakkununnga tunngasunik ilisimasallit inuunermi atukkanik oqilisaasinnaasartut kinguarsimasut najugaanniit ungasissumiikkajuttarput.
Amerlasuutigullu angajoqqaat kinguarsimasunik qitornallit, avinngarusimasuni najugallit, tamanna pissutigalugu nuuttariaqartarput.
Taamaatumik ilaqutariit taamatut ittunik atugallit nuunngikkaluarlutik ungasissumulluunniit angalanngikkaluarlutik ilisimasallit ilisimasaannik iluaquteqarsinnaanngornissaat anguniarneqartariaqarpoq.
Nationalt Center for Telemedicin Tromsømiittoq (NST) pilersinniakkap piviusunngortinniarnerani pingaaruteqassaaq. NST ukiuni arlalinni Norgemi isorliunerusuni isumaginninnikkut peqqinnissakkullu sullissineq pitsanngorsarniarlugu attaveqarnermi teknologimik pitsanngorsaaniarsimagami.