Nuummi NLP atorlugu pikkorissartitsinerit
Aalborgimi Mindstep Instituttet Neuro Lingvistisk Psykologi-imik pikkorissartitsiniarpoq Niuernermik Ilinniarfimmi.
Ilinniarneq immikkoortunut pingasunut avitaavoq, tamarmik ulluni tallimanik sivisussusillit augustimi, septemberimi okotoberimilu ingerlanneqassapput, 2008-mi augustip 22-iani aallartillutik.
Ilinniartitsineq sulinermik misileraatigalugu sungiusarnetalerujussuuvoq, sungiusaatinik ulluinnarni nalaatassanut qanittuararsuit sungiusaatigineqarlutik, ilinniarneq misilitsinnermik NLP-millu angusinermut allagartartaarnermik naggaserneqassaaq.
NLP psykoligi ulluinnarni naapitassaasoq ajornanngitsuuvoq, inunnik ataasiakkaanik nukittunerulersitsissutaasarlunilu anguniagaannik ajornannginnerusumik anguniartitsissutaasinnaavoq, aaqqissuisut oqarput.
- Iliuuserisartakkavut pissusilersornigullu eqqarsaatitsinnit annermik aqunneqartuupput. Taamaattumik takorluukkatsinnut anguniakkatsinnullu akissutissaq allamiinnani uagutsinni namminermiippoq. Oqariartaserput tassaavoq "A change of mind is a change of life" - eqqarsartaatsimik allannguineq inuunermik allannguineruvoq - Søren Dige Mindstep Instituttet-imeersoq oqaarpoq.
NLP aqutsinermi, coaching-imi (siunnersuinermi), inuttut ineriartortitsinermi, isumaqatiginninniarnerni, stress-imik aqutsisinnaanermi, aaqqiagiinngittoqartillugu aaqqiinniarnerni, ilukkullu pissassarnermi atorneqartarpoq, ullumikkullu ilaatigut inuussutissarsionermi suliffinnilu perorsaarnermik ingerlatsiviusuni sakkutut atorneqarlualersimalluni.
Mindstep Insituttet Søren Dige-mit suliffeqarfimmi namminersortumi piosrtatut ukiuni 15-ini misilittagaqartumit pigineqarpoq. Taassuma Mindstep Instituttet 2004-mi pilersippaa, taannalu NLP ikkimmut sammisaralugu pikkorissaanernik sinnersuinermillu siammarluarsimasumik ingerlatsivoq.
Taakku saniatigut suliffeqarfik aamma ilaatigut stress-imik aqutsisinnaanermik, inunnut ataasiakkaanut siunnersuinermik, silami pisunik pikkorissartitsinernik, attaveqarnernut, aaqqiagiinnginnermi isumaqatigiissaarisarnermik suliffeqarfinnillu inerisaarnermik ingerlataqartuuvoq. Søren Dige ilinniartitsinermut pisortaq Poul Kjærgaard peqatigalugu Nuummi pikkorissaasuussaaq.