KNR-imi amigartooruterujussuit
Nuna tamakkerlugu radio tv-lu 11 millioner kroninik amigartooruteqarpoq. Kisianni tamanna siumut aningaasaqarnikkut missingersuusioreerneqarsimavoq, siulersuisut oqarput.
KNR 2007-imi 1,7 mio. kr.-inik sinneqartooruteqarsimassagaluarpoq, suliffeqarfik naatsorsuusereriaatsitut toqqammaviit allat atorsimasuuppagit. Radioqarfilli tamanut kiffartuusisussaasoq akerlianik 10,8 mio. kr.-inik amigartooruteqarpoq, namminersornerusuni najoqqutassiat peqqutigalukgit, KNR-ip siulersuisui tusagassiorfinnut nalunaarumminni allapput.
KNR-ip siulersuisuisa naatsorsuutit 10,8 mio. kr.-inik amigartooruteqartut sapaatip akunnerani kingullermi akuersissutigaat.
- Tamannali tupaallaataanngilaq, ukioq taanna aningaasaqarnikkut missingersuusiornermi 10,7 mio. kr.-inik amigartooruteqartussatut tagginneqarsimammat, KNR-ip siulersuisuini siulittaasoq Frederik Lund aamma pisortaq Lars Lennert-Sandgreen allapput.
Amigartooruteqarnermut peqqutaasoq tassaavoq teknikkikkut atortut digitalisereernerat, taakku nunatta karsianit 2007-imut tigusisinnaatitaaffimmit 17 mio. kr.-nik aningaasalersorneqarsimagamik.
- KNR-i suliffeqarfittut allatulli akuerineqarluni atortut digitalit akiligassaajunnaarsissimasuuppagit knr-i 2007-imi 1,7 mio. kr.-inik sinneqartooruteqarsimassagaluarppoq, Frederik Lund aamma Lars Lennert-Sandgreen allapput.