Eqqissiviilliortoqaraluartoq Pakistaniliarniarput
Nick Nielsen aamma Jakob P. Wetche Pakistaniliarniarput nunanut allanut ministereqarfiup tassunga angalanissaq mianersoqqussutigigaluaraa.
Nick Nielsenip Jakob P. Wetchellu qaqqarsuaq K2, nunarsuarmi qaqqat ulorianarnersaasa ilaat, qaqiniarlugu Pakistaniliarniarnertik aalajangiusimalluinnarpaat. Qaqqasiortartut junip 18-ianni aallassaput.
- Ajoraluartumik Pakistanimi eqqissiviilliortoqarpoq. Taamaakkaluartoq aalajangersimavugut aallarniarluta. NUnanut allanut Ministereqarfik naapertorlugu Pakistanimiinneq ulorianartoqarpoq, namminerlu akisussaaffigalugu tassaniissaagut. Neriuppugut aallannginnitsinni perulluliornerit unikaallakkumaartut, Nick Nielsen oqarpoq.
K2 nunarsuarmi qaqqat qaqiniarlugit ajornakusoornerpaat ulorianarnerpaallu ilagaat. Qaqqaq immap qaavaniit 8.611 meterinik portussusilik nunarsuarmi qaqqat portunersaasa tulleraa. Taanna Pakistanip, Kinap Indiallu killeqarfiisa eqqaanni Karskorambjerginik taaneqartartuni inissisimavoq.
Nick Nielsen Jakob P. Wetchellu naatsorsuutigaat angalanertik augustimi naammassissallugu.
Pakistan orneqqunngilaa
Nunanut allanut ministereqarfiup Pakistanimut angalanernik pisariaqanngitsumik tamanik angalanissat nangaasaarutigai.
Ministeqarfiup quppernerani nittartakkami ilaatigut allassimavoq: »Pakistanimi nunanut killernut perulluliorluni saassussinissat erloqinartumik ulorianartoqarpoq, tamatumani ilanngullugit nunat tamalaat akunnittarfiinut, aammalu kitaamiunik aallarussinissamut. Tamatuminnga ulorianartorsiorfigineqarnersaapput illoqarfiit anginerusut, aammattaarli allani taamaasiortoqartarluni. Qallunaat Pakistaniliartut siunnersorneqarput nalinginnaasumik mianersorluaqqullugit sissuerluaqqullugillu«.
- Angalanissarput Tibetimi qaqqamut Cho Oyu-mut allanngortinnialeraluarparput, maannali Pakistanimut aallaannarniarpugut, Nick Nielsen oqarpoq.