Tusagassiuteqarfinnut maalaartarfiup maalaarut itigartippaa
Sørine Gejl-ip DR-ip piviusulersaarutaa "Kalaallit Nunaannit qimarranneq" pillugu maalaarutaa Danmarkimi tusagassiorfinnut Maalaartarfiup itigartippaa.
Danmarkimi Tusagassiorfiit pillugit Maalaaruteqartarfiup siulittaasuata Jytte Scharlingip Sørine Gejl-ip DR-ip piviusulersaarutaa "Kalaallit Nunaannit qimarranneq" pillugu maalaarutaa eqqartuussisumit nalilerneqartumit itigartippaa.
Tusagassiorfiit pillugit Maalaartarfiup siulittaasuata erseqqissarpaa, Tusagassiorfiit pillugit Maalaartarfimmut maalaaruteqarniaraanni piumasaqaataasoq, maalaaruteqartup maalaarutigineqartunut tunngaqtillugu inatsisitigut namminermut tunngasortaqarnissaannik imaqarnissaat.
- Imaappoq, nammineq inuttut, suliniaqatigiiffittut, suliffeqarfittut imaluunniit assigisaattut taaneqarsimasariaqarpoq, allatulluunniit assilineqarluniluunniit tusagassiorfimmi kinaassusersineqarsimasariaqarpoq. Pineqartoq saqqummiunneqartoq soqutigisaralugu taamaalioirnissaq naammanngilaq. Sørine Gejl aallakaatitami nammineq toqqaannartumik toqqaannanngitsumilluunniit taaneqannginnami taamaalilluni maalaaruteqartoq pineqartumi taamatut siluassiissutissaqanngilaq, taamalu suliaq ingerlanneqarnissaanut tunngavissaqarnani, taamaattumillu tusagassiornermi akisussaaffeqarnermut inatsit tunngavigalugu itigartinneqarluni, Jytte Scharling ilisimatitsivoq.
Sørine Gejl-ip maalaarummini oqaatigaa, aallakaatitassiami "Kalaallit Nunaannit qimarranneq"-mi tusagassiornermi ileqqorissaarnissamut tunngasut unioqqutinneqarsimasut, aallakaatitaasiaq sunniiniutaammat aammalu Kalaallit Nunaannik "piviusumik" takutitsinerunani. Sørine Gejl-ip maalaarummini tapersiissutitut ilaatigut taavaa, nammineq aallakaatitassiap ilaanut misissuisitatut atorneqarsimagami, kisiannili aallakaatitassiami taaneqarnaniluunniit assiminik takutitsisoqarsimanngitsoq.