Netimi nittartagaq persuttaanernik porno-nillu imalik
– Nittartagaq killilersugaanngitsoq atorfissaqartipparput, angut www.susaav.com-imik suliarinnittoq oqarpoq.
Inuit assigiinngitsut atoqatigiittut, inuit imminnut unataattut, inuusuttut "angutinngornermut misilitsittut", politiit tigusarinnittut allarpassuillu filmilianit tigusat kalaallip nittartagaliaani www.susaav.com-imi takuneqarsinnaapput.
Filmimit tigulaakkat inunnut sanngiitunuunngillat.
Nittartakkamik suliarinnittuuvoq Mikael Biilmann Maniitsumeersoq.
Nittartagaq 2006-imi ukiakkut suliarineqarpoq.
Sermitsiap nittartagaq nalorninartoq taanna sooq suliarisimaneraa Mikael Biilmannimut apeqqutigaa.
– Nittartagaliara piviusunik assitaqarpoq, nipilersuutinik nipitalersugaalluni.
– Nittartagaq 2006-imi ukiakkut suliassaaleqeriarama suliaraara.
– Maani Kalaallit Nunaanni aamma nittartakkanik killilersorneqanngitsunik suliaqarsinnaasugut takutikkusussimavara.
– Nittartagaq iluanaarniutiginianngilara, taamaattumik nittartakkami piseqqusaaruteqarnissaq piumasimanngilara, Mikael Biilmann oqarpoq.
Filmilianit tigulaagarpassuit ikinngutinit ilisarisimasaniillu nassiussarsiarisimavai.
Sermitsiami aamma atuaruk.