Aningaasarsiorneq suli pitsanngoriartorpoq
Kalaallit Nunaanni tunisassiorneq tamarmik 2006-imi 2,6 procentimik qaffariarsimavoq. Taamaalilluni siuariartorneq ingerlaannarpoq, tamannalu ilaatigut pisortat aningaasaliinernut atuinermullu aningaasartuutiminnik annertusititsinerannik peqquteqartoq Kalaallit Nunaanni Naatsorsueqqissaartarfiup ilsimatitsissutigaa.
Kalaallit Nunaanni Naatsorsueqqissaartarfiup nunatta 2006-imut naatsorsuutaani kisitsisit saqqummiuteqqammerpai. Taakkunani takuneqarsinnaavoq, nunami maani tunisassiorneq tamarmiusoq 2006-imi 2,6 procentimik annertuseriarsimasoq. 2005-imut 1,0 procentiusimasumut sanilliullugu qaffasinneruvoq.
Taamatut pitsaasumik siumukarnermut pisortat pingaarutilimmik peqataapput, atuinermi 6,5 procentimi qaffariaateqartitsisimagamik. Peqatigitillugu pisortat aningaasaliissutaat 40 procentimik amerleriarsimapput.
Tunisassiorneq tamarmiusoq (bruttonationaprodukt imaluunniit BNP) 2006-imi 10,5 mia. kr.-iusimavoq. Tamanna innuttaasup ataatsip 187.000 kr.-inik tunisassiorsimanerata naligaa, 2005-imut sanilliukkaanni inummut ataatsimut 10.000 kr.-nit missaanni qaffariaataavoq.