Ujaasineq taamaatinneqarpoq
Timmisartumik Cessna 310-mik ataasinngormat Kalaallit Nunaata tunuata Islandillu akornata imartaanut nakkartumik ujaasineq maanna unitsinneqarpoq.
Timmisartuara modeli Cessna 310 marlunnik motorilik ataatsimik issimasoqartoq ataasinngormat motoriata aappaanut ikummatissamik pilersuinermik ajornartorsiulerneq peqqutigalugu nakkarpoq. Sorpiaat ajoqutaasimanersut ilisimaneqanngillat, Kalaallit Nunaanni Sakkutooqarfik ilisimatitsivoq.
Naak umiarsuarniit, timmisartuniit qulimiguulinniillu annertuumik ujaasisoqaraluartoq - ilaatigut qallunaat illersornissamut sakkutuuiniit - sumilluunniit nassaartoqanngilaq.
Ujaasiffimmi sila pitsaasimanngilaq, 3 meterit angullugit portutigisunik maleqarluni isikkivialu allanngorarsimalluni. Ujaasinerup ingerlatiinnarneqarnerata ajunngitsumik kinguneqarsinnaanera ilimananngitsutut nalilerneqarmat Reykjavik-imi annaassiniarnermut aqutsiveqarfiiup ujaasineq unitsippaa.
Qallunaat sakkutuuisa timmisartortartut timmisartuat challengeri Tunup Islandillu imartaata akornanni aalisarnermut nakkutilliisuneersoq tamaani ujaasinermi aqutsisussatut aalajangerneqarpoq, Islandimiut sinerissamik nakkutilliisuisa umiarsuaata taarsiinissaata tungaanut, Kalaallit Nunaanni Sakkutooqarfik nalunaarpoq.
Qallunaat timmisartuata saniatigut aamma nakkutilliissutip VÆDDEREN-ip inuttaminik taarsiiniarluni Reykjavik-imiittup qulimiguulia Lynx peqataavoq.