Suliffissaarusimanermiit isumaginninninermi sullitatut
Nuup Kommuneani suliffissaaleqisut qaammatip ataatsip ingerlanerinnaani 315-iniit 106-inut ikileriarsimapput. Imaanngilaq suliffissaaleqisuniit 216-it suliffissarsissunneqartut.
- Inuit sulisinnaassusilittut nalinerneqanngitsut isumaginninnermut ingerlatsivinnut ingerlateqqinneqarsimapput, Suliffissarsiuussisarfimmi immikkoortortami pisortaq Edvard Mørch Nuummitnutaarsiassanut oqarpoq.
Tamanna isumaginninnermut ingerlatsiviup suliffissarsiuussisarfiullu - Nuup Kommuneata Suliffissaqartitsinermut Piginnaasatigullu Ineriartortitsiviup ilaaniittut - akornanni sulianik agguataarinerup inerneraa
Sullitat taakku piffissami sivisuumi suliffeqarsimanngitsuupput, inuttut ajornartorsiuteqarlutik imaluunniit atornerluinermik ajornartorsiuteqartuullutik, taamaattumik suliffissarsiuussisarfiup suliffissarsissussinnaasimanngilai. Inuit katillugit 219-init pineqarput.
- Taamaaliornikkut suliffissaaleqisut sulisinnaassuseqavissunut nukivut siunnerfeqarnerusumik atorsinnaalissavagut, Edvard Mørch oqarpoq.
Suliffissaaleqisut amerlanerpaartaat ilinniarsimasuunngillat, 18-illu ilinniagaqarsimasuullutik. Suliffissaarusimasut akornanni angutit amerlanerupput, suliffissaarusimasullu affaat 40-nik sinnerlugilluunniit ukioqartuullutik.
Suliffissaarusimasut ilitsersorsinnaajumallugit tulleriissaarinermut siunnersortit pingasut suliffissaqartitsinniarnermullu siunnersortit marluk atorfeqartinneqarput.