Kapisillit kuuat eqqissisimatinneqassaaq
Kapisillit kuuanni kapisillit nungusaanissamik ulorianartorsiortinneqarput, taamaattumillu eqqissisimatinneqartariaqarpoq, taamatut isumaqarpoq Nuummi kommunalbestyrelsi.
Nuup Kangerluani Kapisillit kuuata eqqissisimatinneqarnissaanik siunnersuut maanna tusarniaavigineqalersimavoq, taamatut allappoq Nuup Kommunea quppernermi nittartakkamini.
– Piniarneqapilooramik kapisillit ikiliartorsimapput. Tamatuma saniatigut kuup eqqaa eqqakkanik annertuumik mingutsinneqartarpoq. Taamaattumik kommunalbestyrelsi aalajangersimavoq Kapisilinni kuuk eqqissisimatinneqassasoq, kommunimi siunnersorti Panigpak Daorana oqarpoq.
Eqqissisimatitsinerup kingunerisaanik pujortuleeqqat snescooterillu tamaani angalaqqusaajunnaassapput. Tamatuma saniatigut sumiiffimmi erseqqinnerusumik nalunaarsorsimasumi qassusernissaq inerteqqutaalissaaq.
Aliikkutaraluguli qissattartaartut Kapisillit kuuanni suli kapisilinniarsinnaassapput, kapisillilli pisat minnerpaamik 30 centimeterinik angissuseqassapput mikinerillu aniseqqinneqartassapput.