Angerlarsimaffeqanngitsut kiilerinut inissinneqarput
Nuummi inissaqanngitsut 50-it ilai inissaqartinniarlugit inissiaatileqatigiiffiup Blok P-p kiileria atortariaqalerpaa.
Maannakkoriaq Nuummi inersimasut 44-t meeqqallu sisamat ineqanngillat.
Taamatut paasissutissiivoq INI A/S-imi centerimi pisortaq Susie Kristiansen.
Inissaqanngitsut ilaat Blok R-p kiileriani inini mikisuni najugaqarsimapput. Maannali Blok R nutarterneqartussanngormat najugaqartut tamarmik, aamma angerlarsimaffeqanngitsut kiilerimiittut, blokkimit anissapput.
Taamaattumik sapaatip akunnerani uanimiit madrassitik pigisamininnguatillu Blok P-p kiilerianut nussorpaat. Tamakkua tassaapput angutit kisermaat 40 aamma 50 akornanni ukiullit. Ilaqutariit inissiami ineeqqamut inissinneqartarput.
– Inissiat aserorteriffigineqarsimasut iluarsaanneqartussat ineqanngitsunut inissiinermut atornerusarpavut, centerimi pisortaq Susie Kristiansen Sermitsiamut oqarpoq.
Manna tikillugu inissiaatileqatigiiffiup Tuujummi inissiatoqqat aammalu tassa Tuapannguani inissiatoqqat inissaqanngitsunut atortarsimavai. Maannali Tuujuk kommunip selskabianit Iserit-mit tiguneqarsimavoq, taamaattumillu INI-p Qapiarfiusaaq Blok O-lu atorpai.
Blok P-p kiileriani najugaqalersut ilagaat 40-nik ukiulik Nuka Korneliussen.
Ukiuni kingullerni marlunni ineqarsimanngilaq. Taanna oqaluttuarpoq ullut ilaanni inissiaminut angerlarami matuersaaserfik taarserneqarsimasoq.
– Ineqarnermut akiliut akilersimanngilara. Tamatuma kingorna inissaaleqisimavunga, Nuka Korneliussen oqarpoq.
Sermitsiaq atuaruk.