Piniartut suliartik nuannaraat
Piniartut inuuniarsinnaanerup minnerpaaffianiikkaluarlutilluunniit piniartuunertik unitsissinnaanngilaat, aatsitassarsiornermilu sulisutut sulinerniarnatik. Taamak piniartut Nuummi isumasioqatigiinnerannit suaaruteqarput.
– Allamik inuussutissarsiuteqalerniarluta maaniinngilagut. Maaniippugut piniartutut inuussutissarsiorneq siuarsarniarlugu. Ippassaq tikilluaqqusillutik oqalugiarninni oqarputit aatsitassarsiornermut atatillugu suliffissat 700-t piniartunit aalisartunillu inuttalersorneqarsinnaasut, tamanna puigorluinnaannarsinnaavat - piniartoq aalisartorlu Sisimiuneersoq Marius Olsen taamak erseqqitsigisumik oqarpoq, Aalisarnermut, Piniarnermut Nunalerinermullu Naalakkersuisup Finn Karlsenip oqallinnissamut tunngavissamik oqalugiarneranut atasumik.
Finn Karlsen imminut illersorluni oqaatigaa, suliffissat nutaat 700-it ilaatigut piniartunit aalisartunillu inuttalersorneqarsinnaaneranni isumassarsiaq atorsimagini, isumassarsiarlu taanna isummat qanoq inissisimanerannik paasiniaanermut atorneqartut, Finn Karlsen oqarpoq.
– Uagut aalisartutut piniartutullu siunissaqarnermut upperilluinnarparput, taamaattumik aalisartut piniartullu 700-t aatsitassarsiornermi sulisunngorumasinnaanerannik isumaq tapersersunngilarput”, KNAPK-p siulittaasua Peter Olsen oqarpoq.