Narsami ilinniartitsisussaaleqineq ataatsimiissutigineqartoq
Narsami atuarfimmi siulersuisut sapaatip akunnerata tulliani pingasunngornermi angajoqqaanik ataatsimeersuartitsiniarput.
Narsap kommuniani ilinniartitsisussaaleqineq pillugu Narsami sapaatip akunnerani siuliani akerliussutsimik takutitsisoqareersorlu atuarfimmi siulersuisut maanna angajoqqaanik ataatsimeersuartitsinissamut qaaqqusipput. Tamanna pissaaq pingsunngorpat februaarip 27-iani, ataatsimiinnermilu tassani angajoqqaat ilinniartitsisoqarneq imalunniit ilinniartitsisussaaleqineq oqallisigisinnaassavaat. Atuarfimmi siulersuisut aamma kommunip Meeqqanut, Kulturimut Atuartitaanermullu Ataatsimiitsitaq aggersarniarpaa. Tamanna atuarfiup siulersuisuisa, Narsami borgmesterip Kiista P. Isaksenip, Siumut, aamma Meeqqanut Kulturimut Atuartitaanermullu ataatsimiitsitalip akornanni marlunngormat ataatsimeeqatigiissimanerup imaqarniliornerani takuneqarsinnaavoq.
Imaqarniliorneq naapertorlugu ukiumi atuarfiusumi 2008/09-mi ilinniartitsisussarsiornissap qanoq pitsaanerulersinneqarsinnaaneranut suliniutit qanoq issinnaanerannut ataatsimiitsitaliaq aqqutissiuussisinnaasoq, tamannalu atuarfimmi siulersuisut maanna sulissutigaat. Tamaannali aamma kommunerujussuarni aningaasaqarnikkut pilersaarutitigut qanoq pissarsisoqarsinnaajumaarnersoq apeqqutaassaaq, tassa aatsaat ukiumi atuarfiusumi 2009/10-MI.
Taamaakkaluartoq atuarfimmi siulersuisut isumalluarlutillu neriulluarput, maanna ilinniartitsisussarsiortarnerup ilinniartitsisullu sulisoriinnarnissaanut tunngasut pitsanngorsarneqarnissaanik kissaateqarnerit ikaarsaariarnermut ataatsimiitsitaliami oqallisissanut ilanngunneqarmata (ataatsimiitsitaliaq nunatta kujataani kommuninit pingasunit ilaasortalik).
Kommunip kisitsisaatai naapertorlugit ilinniartitsisut ilinniarsimasut 40-niit 14-init amigaatigineqarput, taakkunanngalu 11-it timelærerinit inuttaqarput.