Timersortarfissuarmi kommunimut qinersineq

Nuummi Inussivik kommunerujussuarnut qinersinermi illutaliisuussaaq. Illoqarfik alleqaaq, katersortarfillu mikivallaalersimalluni.

Inussivik assigiinngitsorpassuarnut atortarpoq, maannalu aamma qinersinernut.

Nuummiut qinersisinnaatitaasut apriilip 8-ni qinersivimmi taasiartulerunik Inussiviliakaassapput. Katersortarfik mikivallaalersimavoq, aammalu qinersisartut Inussuvimmi sukkanerusumik sullinneqarsinnaallutik.

Kommunimut qinersinissamut "demokratiimi ileqqutoqqat ilaannut inuulluaqqusineq"-russaaq, nuuk.gl allappoq.

- qinersisartorpassuit, pingaartumik utoqqaat, katersortarfik taasiartortarfittut nuannaraat, tassami Nuummi tassani qinersisoqartuaannarnikuuvoq, Gerda Knudsen, Nuup Kommuneani allattoqarfimmi immikkoortortami pisortaq oqarpoq.

Nangillunilu oqarpoq; kisianni Inussivik, timersortarfissuaq, qinersinissamut naleqqunneruvoq, qinersisartullu utaqqinissaannik sivikillisaasinnaalluni.

- Inunngorfiit qaammatip ullui tamarmik qinersinermi immikkut nerrivittaqassapput. Nerriviit taasititsiviillu 31-t atorlugit inuit pitsaanerujussuarmik kiffartuussinnaavagut, silami tulleriaarlutik utaqqisariaarutissallutik, Gerda Knudsen oqarpoq.

Kisianni qinersinermut ataatsimiitsitaliap Nikolaj Heinrich siuttoralugu Inussivik akuersissutigeqqaassavaat. Qinersinissaq aqaguppat timersortarfissuaq misissoriartussavaat, taamaalilluni ullormi qinersivimmi kommunit kattunnissaannut ikaarsaariarnermut ataatsimiitsitalianut ilagiinnullu qinersiviusussaasumut suut tamarmik piareersimasinnaaniassammata. Qinersinermi aqutsisussaaq Poul Christensen.

nuuk.gl naapertorlugu Nuup Kommunea ullormi qinersivimmi Inussivimmut immikkut ittumik bussinik ingerlaartitsissaaq.

Powered by Labrador CMS