Nuummi innuttaasunut inissiat nutaat sananeqalerput
Kommunalbestyrlsep ataasinngorpat innuttasunut inissiat 48 sanallugit aallartinneqassanersut aalajangissavaat. Sanaartorneq 113 millioner kroninik akeqassaaq.
Kommunalbestyrelip ataasinngorpat nalinginnaasumik ataatsimiinnissamini Akunnerni inissianik attartortittakkanik nalingissaasunik 48-nik sanaartorneq aallartinneqassanersoq aalajangiiffigissavaa. 2007-imut aningaasaqarnermut missingersuusiamut atatillugu Nuummi politikerit inissiat 100-t sananeqarnissaat akuersissutigaa. Maanna inisianik sanaartornerup immikkoortua siulleq aallartinneqarsinnaalersinnaassaaq.
Sanaartornermut aningaasartuutissat 113 millioner kroniupput, tamanna kommunalbestyrelsip ataasinngorpat nalinginnaasumik ataatsimiinnissaanut takussutissatut ilanngussami takuneqarsinnaavoq.
Taakkunannga Namminersornerusut 28 millioner kroninik tapissuteqassapput, kommunillu karsianiit 7,5 millioner kronit atorneqassallutik. Sinneruttut 77,5 millioner kronit taarsigassarsiniartarfinni atorniarnikkut aningaasalersorniarneqassapput. Namminersornerusut nunap iluani pissutsinut allaffeqarfiata Nuup Kommuniata atorniarsinnaanera tunngaviatigut taperserpaa, kisianni Nuummi kommunerujussuassamut ikaarsaariarnermi ataatsimiitsitaliap atorniarnissaq akuerisinnaajumaarneraa apeqqutaajumaassaaq.
Nalinginnaasumik inissiat 48-t taakku siorna tamakkiisumik suliarinnittussarsiuunneqareerput. Taannartaa Møller & Grønbrog, Arkitekter og planlæggere AS-imit ajugaaffigineqarpoq, Atcomn Grønland AS-imi aammatitartaasarfik v/Ib Bloch aamma Grontmij /Carl Bro-mik suleqateqartut.