Isumaginninermut tunngasunik Maalaartarfik ulikkaarpoq
Inatsisilerituunik amigaateqarnerup kingunerisaanik Sisumaginninnermut tunngasunik maalaartuteqartarfimmi suliat qaleriiaaginnalerput.
Isumaginninnermut tunngasunik maalaaruteqartarfimmi suliassat 456-it uningaannarput, inatsisilerituunillu amigaateqarnerup kingunerisaanik ikiliartorunnarnatik. Taamaattumik Maalaaruteqartarfik Danmarkimi Ankesyrelsemiit tikisitsillunilu attartortariaqarsimavoq, KNR-Radioaviisi naapertorlugu taamak isumaginninnermut tunngasunik maalaaruteqartarfimmi siulittaasoq Naja Joelsen oqarpoq,
Ataatsimiitsitaliaq tallimanngornermi februaarip 22-iani ataatsimiippoq, tassanilu suliat 26-it suliarineqarlutik. Suliat amerlanersaat innuttaasunit inuiaqatigiinni isertitakinnerpaaneersuusarput, Naja Joelsen ilisimatitsivoq.
Najap neriuutigaa, isumaginninnermut maalaaruteqartarfik piffissap ingerlanerani ilaanni sinerissamut angalalluni kommuninut innuttaasunullu ataatsimiitsitaliap suliai pillugit paasititsiniaasinnaajumaartoq. Naja Joelsenip aamma oqaatigaa, pinerluttulerinermut tunngasunut Nunani Avannarlerni Suleqatigiinnermut Siunnersuisoqatigiinnik suleqateqarsinnaaneq iluaqutaasinnaagaluartoq.