Inerteqquteqartitsilerneq Namminersornerusunit malinneqarpoq
Naalakkersuisut issittup nanuanik tunisassianik avammut annissinissamut akuersissutaasartut unitsikkallarneqarnissaat sisamanngormat aalajangiuppaat. Inerteqqutaalersitsineq aprilip aallaqqaataani atuutilissaaq.
Aalajangiineq Washington-imi Isumaqatigiissummut/CITES-imut tunngatillugu Kalaallit Nunaata nunat tamat akornanni pisussaaffiinut atatillug pivoq, taamak Attaveqarnermut Avatangiisinullu Naalakkersuisoqarfimmit tusagassiorfinnut nalunaarummi oqaatigineqarpoq.
Tassani takuneqarsinnaavoq Kalaallit Nunaanni Pinngortitaleriffik CITES-imut tunngatillugu Kalaallit Nunaanni Ilisimatuussutsimut Siunnersuisoqatigiittut inissisimanermigut issitup nanuanit tunisassianik avammut annissisarnermut atatillugu nungusaataanngissuseq pillugu Attaveqaatinut Avatangiisinullu Naalakkersuisoqarfinnut nalunaarusioqqullugu qinnuigineqarsimasoq.
Kalaallit Nunaanni Ilisimatuussutsikkut Siunnersuisoqatigiit nalunaarusiaani ilaatigut atuarneqarsinnaavoq: "nanoqarfinnit tamanit maannakkut pisarineqartartut, taakkununnga kalaallit canadamiullu pisarisartagaat ilanngullugit, nungusaataanngitsumik piniarnertut oqaatigineqarsinnaanngimmat, aammalu issittup nanunanit tunisassiat suminngaaneernerat pillugu paasiniaasinnaasumik niuernikkut ingerlatsivimmik peqanngimmat issittup nanuanit tunisassiat ullumikkut avammut nioqqutigineqartarnerat ajoqutaasumik sunniuteqannginnera inaarutaasumik isummiunneqarsinnaanngitsoq."
Naalakkersuisut nungusaataanngissusermut nalunaarusiaq tunngavigerpiarlugu issittup nanuanit tunisassianik avammut niuersinnaanermut akuersissutinik tunniussisarnerup apriilip 1-iani 2008-imiit atuutilersussamik unitsikkallarneqarnissaa aalajangerneqarpoq, inerteqquteqarnerlu Ilisimatuussutsimut Siunnersuisoqatigiinniit nungusaataanngissutsip siumut saanneranik nalunaaruteqarnissap tungaanut unitsitsigallarneruvoq.
Naalakkersuisut suleqatigiissitaliaq issittup nanuanit tunuisassiat avammut niuerutiginissaannut akuersissutit ammaateqqinneqarnissaat pillugu suleriaasissamut pilersaarummut siunnersuusiortussaq pilersippaat. Suleqatigiissitap pitsaasumik NDF-eqarnissap anguneqarnissaanut suliniutit suut pisariaqartinneqassanersut nassuiaasiortussaavaa, aningaasaqarnermut piffissalersuinermullu tunngasut ilanngullugit.
Peqatigitillugu Aalisarnermut, Piniarnermut Nunalerinermullu Naalakkersuisoqarfik Canadamik/Nunavut-mik ataatsimoortumik aqutseriaaseqarnissamik issittup nanuisa nungusaataanngitsumik avillugit atorluarneqarnissaannik qularnaarinnittussamik isumaqatigiissuteqarnissaq sulissutigaa, Attaveqarnermut Avatangiisinullu Naalakkersuisoqarfimmit tusagassiorfinnut nalunaarummi allassimavoq.