Enoksenip Foghillu isumaginninnikkut isumaqatigiissutaat IA-p ujartorpaa
– Isumagininnnermi ilinniagaqarfiit pillugit ministeriunermik isumaqatigiissut naak, IA-p politikkikkut siulittaasuata tullia aperivoq.
Naalakkersuisut siulittaasuata Hans Enoksenip isumaginninnermi ilinniagaqarfiit, ministeriunermik isumaqatigiissuteqarfiginiakkani, maanna nassuiaateqarfigissavaa. Isumaqatigiissut januarip aallartinnerani radioavisimi eqqaaneqarpoq, tassani taaneqarluni isumaginninnermi perorsaanikkut ilinniagaqarfiit pitsanngorsarnissaannik qallunaat ikiuunnissaannut suleqatigiinnissamik isumaqatigiissutitut.
Inatsisartunut ilaasortap Inuit Ataqatigiillu politikkikkut siulittaasuata tulliata Asii Chemnitz Narupip oqaatigaa, saapaatip akunneri marlunngulersuni isumaqatigiissutip immikkoortualunnerusortai ujartorsimallugit. Taamaattumik maanna naalakkersuisut siulittaasuanngut §36-imi apeqqutinik arlalinnik apeqquteqarpoq.
– Inuit Ataqatigiinniit isumaqatigiissutip imarisaata paasinissaa qilanaarisimavarput, taamaattumik januarip 10-anniilli Namminersornerullutik Oqartussat quppernermi nittartagaanni malinnaasimavunga. Tupigusuutigaara isumaqatigiissut suli tamanit pineqarsinnaanngimmat, Asii Chemnitz Narupip apeqqutini tamaatut tunngavilersorpai.
Apeqqutini ilaatigut takuneqarsinnaavoq Kalaallit Nunaanni isumaginninnermi ilinniagaqarfiit pitsanngorsaarnissaat pillugu Namminersornerullutik Oqartussat naalakkersuisullu isumaqatigiissutaat statsministeriaqarfiup ilisimasaqarfiginnginnguatsiaraa.