Nuummi umiarsualivissuaq Namminersornerusut akerlilersorpaat
Namminersornerullutik Oqartussat nuna tamakkerlugu umiarsualivimmut selskabimik pilersitsinissamik Namminersornerullutik Oqartussat pilersaarutaat Nuup borgmesteriata sakkkortuumik qisuariarfigai.
Naalakkersuisut siulittaasuannut Hans Enoksenimut allakkatigut ammasutigut Nuup borgmesteriata Nikolaj Heinrichip, Siumut, ajuusaarutigalugu oqaatigaa Nuummi nunanut tamalaanut umiarsualivissarsuarmik nutaamik pilersitsinissamik sulinerup Namminersornerullutik Oqartussanit siuarsarneqannginnera.
Borgmesteri allappoq Nuup Kommuneata pilersaarutit piareersimatikkai, tamatumani ilanngullugu illoqarfiit pingaarnersaanni umiarsualivimmut nutaamut ingerlatsinermut pilersaarut. Sulineq ingerlanneqarsimavoq Namminersornerullutik Oqartussat qanimut suleqatigalugit, Nikolaj Heinrichilu naapertorlugu saqqummiussaq 2007-imi aasaq sioqqullugu suliarineqareersimavoq. Tassani siunniunneqarpoq ataatsimut umiarsualivimmut aktieselskabimik pilersitsisoqassasoq piginnittuussallutik aningaasaliisut namminersortut, Namminersornerullutik Oqartussat aamma Nuup Kommunea.
Maanna pilersaaruteqartoqannguatsiarmat nuna tamakkerlugu umiarsualivimmut selskabiliornissaq, tamanna ingerlatsinermut aaqqissuusseqqinnermi tunngaviusunut akerliulluinnarpoq, tassani kommunersuit nutaat ataasiakkaat kommuniminni angallannikkut suliassat tigusinnaassallugit, Nikolaj Heinrich allappoq.
– Taamaattumik Nuup Kommuneata qinnutigissavaa Nuummi nunanut tamalaanut umiarsualivissarsuarmik pilersitsinissamik sulineq kinguarsarneqaqqissanngitsoq aammalu ingerlatsinermi aaqqissuusseqqinnermi tunngavissat attatiinnarneqassasut, taamaasilluni kommunersuit nutaat periarfissaqassallutik kommunini ataasiakkaani ineriartornerup qulakkeernissaanik, Nuup borgmesteria naalakkersuisut siulittaasuannut allakkamini ammasuni allappoq.