Alcoap aalajangiinnginnerani isumasioqatigiittoqassaaq
Ilisimatuut, politikerit aqutsisullu 80-it pingasunngorpat sisamanngorpallu Kalaallit Nunaanni nunap immikkoortuinut pilersaarusiorneq pillugu Nuummi isumasioqatigiinnermi peqataassapput.
Januarip 23-ianni 24-iannilu isumasioqatigiinneq Alcoap aluminiumik aatsitsiviata inissinneqarnissaanut aalajangiinissamut piareersaatit ilagaat. Pilersaarusiornermut avatangiisinik naliliinermik sulinerup maanna ingerlanneqartup takutissimavaa pilersaarusiarujussuit piffissamut sivisuumut sunniutaasa annertunerusumik qulaajarneqarnissaat pisariaqartinneqartoq, nunap immikkoortuata ineriartorneranut sanilliullufu. Taamatut paasissutissiivoq Avatangiisinut Pinngortitamullu Pisortaqarfik tusagassiorfinnut nalunaarutikkut.
Pisortaqarfik tassani allappoq "nutaaliaasumik pilersaarusiorneq G-50-mi G-60-imilu pilersaarutigineqartarnerannit allanngorsimasorujussuusoq. Ullumikkut innuttaasut piareersarnerni annertunerusumik peqataatinneqartarput, siusinnerusumillu pissutsit taamaattut amerlanerusut takuneqarsimapput". Isumasioqatigiinnermi timitalimmik pilersaarusiornermut periutsit nutaaliat ilisimatuunit Canadameersunit, Islandimeersunit, Norgemeersunit, Sverigemeersunit, Finlandimeersunit Danmarkimeersunillu saqqummiunneqassapput.
- Isumasioqatigiissitsinermi siunertat ilagaat isumassarsiornissaq qanoq isilluta Kalaallit Nunaanni kommunersuarni nutaani aammalu suliffissuaqarfinnut pilersaarutini annertunerusuni ineriartorneq ammarsinnaaneripput, tamannalu peqatigalugu ineriartorneq atasinnaasoq qulakkeerllugu, aaqqissueqataasoq, allaffimmi pisortaq Klaus Georg Hansen, Avatangiisinut Pinngortitamullu Pisortaqarfimmi Nuna tamakkerlugu pilersaarusiornermut Immikkoortoqarfimmeersoq, oqarpoq.