Sakialluummik tunillanneqarsimanermik misissuineq aallartippoq
Naalakkersuisut 2007-imi nuna tamakkerlugu nappaat sakialluut akiorniarlugu ukiuni 2007-imit 2012-imut iliuusissatut pilersaarut akueraat, tamanna tunngavigalugu nuna tamakkerlugu 1. aamma 10. 11.klassimilu atuartunut aaversinnikkut misissuinissamik neqerooruteqartoqarpoq, misissueriaaseq taaguuteqarpoq: Quantiferon.
Meeqqat inersimasunut naleqqiullutik tunillanneqarnissamut qaninnerusarput piffissallu sivikitsup iluani tunillanneqarsimasarlutik. Inersimasulli ukiut arlallit napparsimassutiginngikkaluarlugu tunillannartoqarsinnaasarput taamaammallu ukiut arlalissuit matuma siornali tunillanneqarsimasarlutik. Kalaallit Nunaanni sakialluummik tunillanneqarsimasut 25-30 %-ii meeraapput.
Kujataani atuartut akornanni amerlaqisut tunillanneqarsimapput. Meeqqat napparsimalersimasut tunillanneqarsimasullu amerlassusaasa nappaammik tuniluuttoqarneranik takutitsipput. Meeqqat tunillanneqarsimasut akornanni 25 %-it angullugit napparsimalersinnaapput.
Tunillanneqarsimasunik misissorluagassanillu nassaarniarnermi ameq ikiarlugu kapitilluni misissueriaatsimit aaversinneq patajaannerullunilu eqqorneruvoq. Aaversinnerup sakialluummik tunillanneqarsimasinnaaneq takutippagu meeqqat nakorsamit misissorluarneqarnissamut aggersarneqassapput. Nakorsap nakorsarneqartariaqarnersut aalangissavaa. Tunillanneqarsimasut angajoqqaavi immikkut toqqarlugit ilisimatinneqassapput.
Nuummi meeqqat atuartut misissortinnissamut decembarimi 2007-imi neqeroorfigineqarput, upernaallu ingerlanerani sinerissap sinnerani atuartut ukiup atuarfiusup nalaani misissortinnissamik neqeroorfigineqassapput. Sinerissami napparsimaveqarfiit atuarfiit aqqutigalugit misissuinissap qaqugu pinissaanik angajoqqaanut ilisimatitsissapput.
Nappaat sakialluut TB akiorniarlugu nuna tamakkerlugu iliuusissatut siunniussat Peqqinnissakkut Nakkutilliisoqarfiup nittartagaani www.nanoq.gl takuneqarsinnaapput.