Alcoa-mik ernummateqarneq ingasattajaagaavoq
Taamak Inuussutissarsiornermut Naalakkersuisoq Siverth K. Heimnann isumaqarpoq. Taassuma Alcoa-p aluminiumiliorfissarssuarmik pilersaarutaata akuerineqarnissaanut piffissaliussamut tunngatillugu pilersaarut pillugu sukumiisumik oqallisigineqarnissaanut piffissakippallaarneragaanera isumaqatiginngilaa.
Piffissakippallaarsorinnittut ilagaat Kalaallit Nunaanni Pinngortitap Avatangiisillu pillugit suliniaqatigiiffik Avataq.
– Isumaqarpunga ernumaneq ingasattajaagaasoq, Siverth K. Heilmann knr.gl-imut oqarpoq.
– Aatsitsivissarsuup inissiivigisinnaasaani pingasuusuni, Maniitsumi, Sisimiuni Nuummilu pitsaasumik paasititsiniaasarsimavugut. Isornartorsiuineq annermik Nuummi pivoq, kisianni misissuisitsinissat pisariaqartut naammassiniarnissaannut piffissaqarlunilu nunanit allanit misilittakkat ilanngullugit paasiniarneqassallutik.
- Uanga assersuutigalugu Brasiliami aatsitsivissuaq tikeraarsimavara, taanna avatangiisinik illersuiniaqatigiit aallaqqaammut akerlerisimavaat, maannali tapersersulersimallugu, naalakkersuisunut ilaasortaq oqarpoq.
Kisianni pilersaarutit malillugit inatsiartut Alcoa-p pilersaarutaa aappaagu ukiakkut aatsaat inaarutaasumik isummerfigisussaavaat. Taamaakkaluartoq maannakkut upernaamut ataatsimiinnissami sumut inissinneqarsinnaanera aalajangiiffigisussaavaat.