Nunafond-i aningaasanik agguaavoq

Sisimiuni Kulturip Illorsua TV-kkullu aallakaatitassiaq "QAPUK" aningaasaliiffigineqartunut ilaapput.

Stina Berthelsen aamma Inuk Silis Høegh Nunafonden-mit 155.000 koruuninik pissarsipput, TV-kkut aallakaatitassiaannut "QAPUK"-mut atugassanik.

Nunafonden-ip januaarimi ataatsimiinnermini qinnuteqaatit tiguneqartut 80-it, katillugit kr. 10.550.000-inik aningaasartallit suliarai. Qinnuteqaatinit taakkunannga 51-it tamakkiisumik ilaannaasumilluunniit akuerineqarput, taakkulu katillugit kr. 2.355.000-inik aningaasartaqarput.

Qinnuteqaatinit annertunerusunit taaneqarsinnaasut ilaatigut tassaapput Sisimiuni Kulturip Illorsuata Taseralik-up ammarneqarnerani tunissutitut kr. 100.000-it tunniunneqassapput, Inuk Silis Høegh & Stina Berthelsen-ip TV-kkut aallakaatitassiaannut ”QAPUK”-mut kr. 155.000-it tunniunneqassapput, Mikisoq Lynge aamma Otto Rosing filmiliaminnut ”Nuummioq”-mut kr. 250.000-inik tunineqassapput, aamma Danske Døve Landsforbund kalaallit tusilartut Danmarkimi atugaannik misissuinissamut aammalu pinaveersaartitsiniarluni suliniarnissamut kr. 100.000-inik tunineqassaaq.

GIT/Grønland i Tivoli 2008 kr. 300.000-inik tunineqassaaq, tassanilu 2008-mi juulip ulluisa 31-anni aamma aggustip ulluisa aallaqqaataanni inunnut 75-100.000-inut kalaallit eqqumiitsuliaannik kulturiannillu ilisarititsinissaq siunertarineqarpoq.

Atuakkiornermi suliat arfineq pingasut katillugit kr. 198.500-nik tunineqarput.

Taakkunannga taaneqarsinnaasoq tassaavoq Jørgen Chemnitz-ip atuakkiiaa ”Dette er ikke en by, det er en tilstand”-imik taasimasaa – atuakkiaq nammineerluni assilisaanik najukkamilu innuttaasut oqaluttuaanik imaqarpoq.

Ataatsimuualaarnissat qulinit tapiiffigineqartussanit CISV Greenland taaneqarsinnaavoq, suliniullu taanna ateqarpoq “Nuuk, meeqqat illoqarfiat 2008”, tassanilu meeqqat nunanit aqqaneq marlunneersunit 72-it oqaatigineqareersutut Nuummi unammiuaassapput. Suliniummut tassunga kr. 50.000-it aningaasaliissutigineqassapput.

Timersornerup silarsuaanut aningaasaliissutitut Qaarsuni “Qimusseq 87” taaneqarsinnaavoq, taannalu peqatigiiffiup ukiut 20-inngorlugit nalliuttorsiorneranut atatillugu qimussimik sukkaniutitsiniarpoq. Peqatigiiffik kr. 25.000-inik aningaasaliiffigineqassaaq. Tasiilaq Volleyball Klub, ilaasortaminik Kalaallit Nunaanni pissartanngorniunnissamut najukkami sungiusartitsisoq kr. 25.000-inik tunineqassaaq * Naggataagullu NUP sisoraatinik ujakkaarluni nuna tamakkerlugu poorskikkunni pissartanngorniunnissamut peqataatitsisussaavoq, klubbilu tamatumunnga atugassanik kr. 30.000-inik pissarsisinnaalerpoq.

Nunafonden-ip 2008-mi ataatsimiinnera siulleq januaarip ulluisa 23-anni pisussaasimagaluarpoq, kisiannili silarlunnera pissutigalugu siulersuisunut ilaasortat marluk Danmarkimiit timmisartorsuarmut ilaallutik ataatsimiinnissamut angummatinngitsoorput, taamaattumillu ataatsimiinnermi suliassat oqarasuaatikkut/e-mail-ikkut suliarineqarput, tamannalu pissutigalugu suliassat suliarineqarnerat kinguaattoorfiuvoq, tamannalu utoqqatsissutigaarput.

Aningaasaliiffigineqartut tamarmiusut allattorsimaffiat nittartakkami www.nunafonden.gl alakkarlugu takuneqarsinnaapput.

Powered by Labrador CMS