Pissakilliortut eqqugaassapput
– Inigisamut akitsuineq akuerineqarsinnaanngilaq, Ane Egede Mathæussen, Nuummi kommunalbestyrelsemi ilaasortaq isumaqarpoq
Ane Egede Mathæussen naalakkersuisunut ammasumik allagaqarpoq.
– Inigisamut akitsueqqammeriarlusi aamma suli januar-imi akitsueqqinniarnersi pissakinnerusut eqqoqqillugit akilersinnaava, Ane Egede Mathæussen aperivoq.
– Isumaqarpunga akilersinnaanngilluinnartoq. Tassami pissakinnerusut sutigut tamatigut eqqugaajuaannarput tamannalu taamaatittariaqarsoraara.
– Ukiorpaalunngulersuni isumaginninnermut tunngasunik suliaqarninni takusinnaasara aana pissakinnerusut taamatut eqqorneqartarnerat inuuniarnerannut ilungersunareeqisumut suli erloqinarninngortarpoq akissaqarniarnerat eqqarsaatigalugu. Ingammik angajoqqaanut kisermaanut, soorunalumi aamma angajoqqaat marluugaluarlutik ilaqartarput aappaa allatut ajornartumik angerlarsimaannartariaqartartoq assigiinngitsunik peqquteqarluni. Taamaattoqarnerani mikisunik meeraqartoqartillugu atisassatigut malinnaaniarneq aammalumi nerisassatigut.
– Kialuunniit takorloorsinnaavaa eqqarsarsinnaasup qanoq inuuniarnerat erloqinarsinnaatigisimassasoq, ullumikkummi suna tamarmi akitsortigisoq, Ane Egede Mathæussen oqarpoq.
– Illuatungaani Inuutissarsiorsinnaanermut ingerlatanut pikkorinnerusariaqarpugut tassuunakkummi Nunatta aningaasaqarniarnera patajaannerusoq angusinnaavarput, tamanullu akissaqarsinnaaneq anguneqarsinnaalluni.
Ane Egede Mathæussen assersuusiorpoq.
– Assersuutigisinnaavara Royal Greenland-ni aalisakkat akii meeraanittinniilli akit qaffangaarsimanngillat akerlianiilli bonus-isisarsimaneq peerneqarnikuuvoq. Taarsiullugilli atorfinititsiortornerit allaffissuarni pilersimapput oqaannarsinnaavugut assersuutigissavara direktør-i suli direktør-ileqqillugu. Suleriaaseq innuttaasunut akilersinnaanngitsumik ingerlaneq taamaatittariaqarpoq.
– Nunanut allanut suliffissuaqarneq tamakkiisumik nuutinneqarnera nunatsinni innuttaasunut assorsuaq malunnartumik suliffissaaleqilernermik kinguneqarpoq, tamannalu iluarsineqartariaqartutut isigaara tassami nunatsinni aalisakkat pisaasartut tamarmik avammut annissornagit affaaluunniit nunatsinni suliffissuaqarnikkut piorsaanermi atorneqarsinnaasariaqarluinnartutut isigaakka. Nunani allani suliaasartut tunisassiat piariikkat soorunami aamma nunatsinni suliarineqarsinnaalluarput avammut tunisassiassatut ineriikkatut, taamaalilluni suliffissaaleqineq aammalumi inuuniarnikkut nammineersinnaaneruneq innuttaasunut anguneqarsinnaasariaqarpoq.
– Nunatsinni suliffissuaqarneq piorsarluarneqartariaqalerpoq, sooq nunat eqqaamiugut suliffissuaqarnikkut imminut akilersinnaasumik ingerlasinnaasut uagut nunatsinni akilersinnaanngitsutut piinnassaagut, Ane Egede Mathæussen oqarpoq.