Demokraatit meeqqat akornanni pitsuuneq piujunnaarsinniarpaat
Demokraatit 2008-mi suliniutissaasa pingaarnersarissavaat meeqqat akornanni piitsuunerup piujunnaarsinneqarnissaa peqatigitillugulu meeqqat ilaqutaasalu atugaasa pitsaanerulersinnissat, Per Berthelsen ukiortaami pilluaqqussummini allapoq.
Meeqqat Inuusuttullu pillugit qitiusumik Ilisimasaqarfiup - MIPI-p - meeqqat quliugaangata ataaseq piitsut atugarisaanik atugaqartuusoq uppernarsereeraalu Demokraatit siulittaasuat Per Berthelsen aalajangerpoq ukioq 2008 meeqqat ukiorissagaat.
– Ilisimatitsissutip taassuma assut tupatsippaanga. Aliatsatsippaanga. Taamalu aamma pingaarutilerujussuarmik aalajangiussaqartillunga, Per Berthelsen ukiortaami pilluaqqussutimini allappoq.
Per Berthelsenip aalajangiuppaa meeqqat akornanni pitsuunerup piujunnaarnissaanut sorsunnissaq peqatigitillugulu meeqqanut tamanut atugassarititaasut pitsaanerulersinneqarnissaat Demokraatit siunissami suliassaasa pingaarnersarissagaat.
– Aalajangiussaq tamanna soorunami demokraatit akornanni tamani ilassilluarneqarpoq, demokraatit inuiaqatigiit sanngiinnersaanik sullisserusuttutut naluneqanngimmat - tassunga pingaartumik meeqqat inuusuttullu atugaat ilanngullugit, Per Berthelsen allapoq.
MIPI-p
– Meeqqat inuusuttullu atugarisaasa politikkikkut oqallisaasut pingaarnersaalernissaannik Demokraatit sorsuutiginninnerat sapinngisamik amerlanerpaanit taperseersorneqarnissaanik kissaateqarluta Kalaallit Nunaanni kikkut tamaasa ukiortaami pilluaqqussallugit piffissanngorpoq! Tamassi nersualaarutissaraarsi! Per Berthelsen ukiortaami piluaqqusinermini allappoq.