Ukiumi Inuusuttutsialaq

Andrea Filemonsen 22-nik ukiulik Sofa Aappalaartumi aaqqissuisuusunit Ukiup Inuusuttutsialaatut toqqarneqarpoq.

Adios 2007 tv-kut inuusuttunut allakaatitassiaq nuannarineqarluartoq Sofa Aappalaartoq aaqqissuisoralugu ukiutoqqap unukkuani aallakaatinneqartumi Andrea Filemonsen 22-inik ukiulik nunaqarfimmit Ikerasaarsummeersoq ukiup inuusuttutsialaatut toqqarpaat.

Sofa Aappalaartup inuusuttut Kalaallit Nunaanni tamaneersut qinnuigisimavaat inuusuttoqamminnik Ukiup Inuusuttutsialaatut toqqarusutaannik toqqaaqqullugit, siunnersuuterpassuillu akornanni Andrea Filemonsen, inuusuttunnguugaluarluni 4-nik meeraqartoq anaanamilu toqunerata kingorna qatanngitiminut nukarnernut akisussaasunngorsimasoq inuusuttutsialattut toqqarneqarpoq.

Andrea 15-inik ukioqarluni 2001-imi meerartaaqqaarpoq. 2002-mi meerartaaqqippoq, 2003-milu marluliaatitaarluni, taamaalilluni 18-iinnarnik ukioqarluni sisamanik meeraqarluni. 2005-imi anaanaa toqummat aamma qatanngutiminut nukarlernut akisussaasunngorpoq, qatanngutigiinni arnani angajullersaagami.

Andrea angerlarsimaannartuuvoq, angutaataa suliffeqartuulluni. Meerarpassuarnik ajungilluinnartumik isumaginnittuunermi saniatigut aamma peqatigiiffilerinermik timersortartullu peqatigiiffiini suleqataalluartuuvoq, siulersuisunilu ilaasortaalluni.

Pisussaaffippassuaqarluni meerarpassuillu akisussaaffigigaluarlugit suliani pikkorilluinnarluni ingerlappai. Anaanagigaluani sinnerlugu meeqqat tamaasa asanninnermik tuniorartuarpai. Inuuvoq nikallujuitsoq nuannaartorlu, suliassanilu orulunani suliarisarlugit.

Pilunguaq 23-inik ukiulik Attu-meersoq Andrea-p nersornaaserneqarnissaanut innersuussisuuvoq, toqqarneqarnissaanullu tunngavilersuutai ukuupput:

– Inuit inuusuttunnguit taamak annertutigisumik akisussaaffeqarnerat nersornartuuvoq. Anaanamik annaasaqarneq qanoq oqimaatsigisinnaanersoq takorluuginnarsinnaavarput. Uagut inuusuttuusugut pisut taamak ittut aqqusaassallugit nukissaqarfiginissaat misigisimanngilagut, akisussaaffimmillu taamak annertutigisumik tigusinissatsinnut kajumissuseqanngilluinnarluta. Taamaattumik isumaqarpunga, arnaq taanna uagutsinnut tamanut maligassiuisuusoq. Taassuma takutippaa, qanorluunniit oqimaatsigisumik eqqorneqarsimagaluaraanni ingerlaqqittoqarsinnaallunilu pitsaasumik inuusoqarsinnaasoq.

Powered by Labrador CMS