Nuummi qamittoorneq
Sarfaaruttoorneq pivoq Nuummi innaallagissamik nuutitsiviup nordhavn-imilu innaallagissiorfiup akornanni kabelit pingaarnerit aappaata illersuutaa relæ-a kipisoormat.
Ullaaq nal. 8.39 Nuuk innaallagiaaruppoq, illoqarfillu tamarmi unilluni. Suliffeqarfiit computerinik isumalluuteqartuusut tamarmik nalunaaquttap ataatsip akunenrata ataatsip missaani sulisinnaasimanngillat, silap qaammarnissaata tungaanut taamiullutik naneruutaannarnillu qaammaqquteqarlutik.
Nuummi Nordhavn-imilu sarfaliorfimmi innaallagissamut nuutitsissutit unittoormat kabeli alla artukkerneqalersimavoq, kingornalu aamma sarfaarulluni. Taamaalilluni Utoqqarmiut Kangerluarsuanniitt erngup nukinganit pilersorneqarneq kipitinneqarpoq, taamalu Nuummi suut tamarmik taartuinnanngorlutillu nipaarupput, biilit ingerlaartut kisiisa eqqaassanngikkaanni.
Tamatuma kingorna Utoqqarmiut Kangerluarsuani erngup nukinganik innaallagissiuut aallartinneqarpoq Nukissiorfimmilu sulisut Nuummi sarfaqaleqqinnissaa ulapputigalugu. Tamannalu pivoq illoqarfiup immikkoortui ataasiakkaat innaallagissamik aqqutsinut ataatsimoortunut sarfanitseqqinneqarlutik.
Amerlanersaat nal. qulit missaanni sarfaqaqqilerput, sumiiffiilli ataasiakkaat aatsaat 11.30 missaani sarfanipput. Illoqarfik tamarmi nal. 13.00 sarfaqaqqilerpoq.
Iloqarfiup tamarmi sarfaneqqinnissaata tungaanut taamak sivisutigineranut peqqutaavoq, taamatut tamakkiisumik sarfaaruttoortoqarsimatillugu illoqarfimmi sarfamik siammarteriviit tamarmik immikkoortukkuutaarlugit ikititerniarneqartussaanerat, tamannalu sivisusarpoq.
Ulluni makunani issinnerujussuanik innaallagissamik atuineq ima annertutigilersimavoq, sumiiffiit ilaani innaallagissamik pilersuinerup aallarteqqinniarnera ajornartorsiutaalersimagaluarluni. Innaallagissamik atuinerulersimaneq ikeqqinniassatillugu innaallagissamik siammarterivinnut artukkiisarpoq.
Qinngorpumi qamittoorneq
2007-imi decembarip 31-ani Nuup immikkoortortaani Qinngorpumi nal. 1630-20.45 akornani qamittoorneqarpoq. Qamittoorneq peqquteqarpoq innaallagissamik siammarteriviit marluk akornanni sarfamut sakkortuumut kabelit attuuttornerat. Jannuaarip 31-iani aamma issinnerujussua peqqutaalluni ikeqqinniarnerata sivisuneranut peqqutaavoq. Tamatuma kingunerisaanik innaallagissamik kiassaatinik kissarneq aalajangersimasoq appariarujussuarmat. Taamaanneranillu illoqarfiup immikoortuani immikkoortoq ataaseq ikittorlu sarfaaruteqqittarpoq.
Qamittortillugu kiassaatit innaallagissamoortut qimakkit
Pisoq iluatsillugu Nukissiorfiit erseqqissaatigerusuppaa, inuit innaallagissamik aalajangersimasumik kiassartartut sarfaneqqinnissamut utaqqinerup sivikinnerulersinniarneranut peqataaqqullugit, tassa qamittoortoqartillugu innaallagissamik kiassaatit qaminnerisigut. Taamaalilluni innaallagissamik kiassaatit kingorna sarfaneqqereeraangat kingusinnerutillugit ikinneqassapput. Taamaaliornikkut innaallagissamik sarfaliorneq pisariaqartitsinermut malinnaanerusinnaassaaq, taamaalillunilu iloqarfimmi immikkoortut eqqorneqartut sarfanitseqqiniarnerani ajornartorsiutaasartut ikinnerulersinneqassapput, Nukissiorfiit tusagassiorfinnut nalunaarummi allappoq.