Jan Boassen Paamiuneersoq timmisartumut billettinik eqquivoq
Siullermik Paamiut mittarfittaarput, massakkullu Jan Boassen Sermitsiap juullimut eqquiniaasitsinerani akissarsiassat pingaarnersaannik eqquivoq.
Aviisip juullimut unammisitsinerani eqqugassat pingaarnersaannik eqquisimanerarluni Sermitsiap sisamanngornermi Sermitsiap sinerfigimmani tamanna Jan Boassenip Paamiuneersup upperinngeqqaaraluarpaa.
Eqqugassaq pilerinartoq - inuit marluk Air Greenlandimut ilaallutik siumut utimullu timmisartornissaat - nunatsinni imaliuunniit Danmarkimukarliarnermut uternermullu atorneqarsinnaapput, taamaattumillu allakkerisarfimmi sulisoq 45-nik ukiulik eqqarsartorujussuanngoriasaarpoq.
Qanoq ililluni Paamiuniit aallarnissartik eqqarsaatigisariaarutereernikuugaluarpaa, tassami illoqarfik juullilerneranili mittarfittaareernikuummat.
– Apeqqutaalerporli nuliaralu Qaqortuliassanersugut Sisimiuliassanersugulluiunniit - upernaaru jornguma nivissap nukappissalluunniit apersortinnissaannut peqataajartorluta, Jan Boassen eqqarsaatersorpoq.
Eqquinngisaannarsimavoq
Jan Boassen meeraallunili Sermitsiap juullimut unammisitsinerinut peqataasalersimavoq. Nissiaqqalli ilutsitsisinngisaannarsimavaat. Sumilluunniit eqquisimanngisaannarpoq.
Aatsaat massakkut eqquivoq, makitsisuuppullu sanasuuneq Nikolaj Ezekiassen, Nuuk, qitornaalu marluk Kuluk aamma Malik.
Makinneqartut 32-it akornanni Jan Boassen iluanaarnersaavoq, taannalu massakkut timmisartorluni angalasussanngorpoq Qaqortumut Sisimiunulluunniit. Immaqaluunniit nuliilu allatut aalajangerlutik Danmarkiliarsinnaapput.