Friday, January 4, 2008 - 01:42

Illusisussanut akissaajarnerujussuaq

Namminersornerullutik Oqartussat kommunillu inissiaataasa attartortittakkat tamarmiusut iluarsaanneqartariaqassusiat 2,1 milliarder kroninut tagginneqarsimavoq.
Namminersornerullutik Oqartussat illuutiminnik akiviisut akilersillugit tuniniaapput, iluarsaassinissarli illusisussat namminneq akilissavaat.

Attartortut inatsisartut peqqussutaat nutaaq ukiortaamiit atuutilersoq tunngavigalugu najukkaminnik Kalaallit Nunaanni Namminersornerullutik Oqartussaniit kommuniniillu piserusuttut eqqarsaqqissaartariaqassapput.

Blokkit ilarpassui aserfallannikooqimmata illunik piginnittuulersussat illusinerminnut ilanngullugu ukiualunnguit ingerlanerini iluarsaassinermut aningaasartuuterpassuaqartariaqalersinnaanertik ilanngullugu naatsorsuutigissavaat.

– Blok T Nuummiittoq ukiut 15-it ingerlanerini annerusumik nangeqqittariaqartussamik pisariaqarnerpaarsiuinnarlugu iluarsaanneqarmat iluarsaassineq kvadratmeterimut 10.293 kroneqarnikuuvoq, illoqarnermut attaveqarnermullu pisortaqarfimmi direktøri Olafur P. Nielsen Sermitsiamut oqarpoq.

Taamaattumillu namminersornerullutik oqartussat blokkit Q, R aamma S isatersinnarlugit toqqaviisigut andelsboligiusussanik nutaanik illulirtoqarnissaa aalajangiuppaat.

Blokkit iluarsaatiinnarnagit nutaanik sanaqqinnissaq akikinnerussammat.

Pisortat inissiaataasa tamarmiusut iluarsaanneqarnissaat pillugu 2000-mi pilersaarusiami takuneqarsinnaavoq, iluarsaassinissaq nutarterinissarlu 2,1 milliarder kroninik naleqartariaqassasoq.

Iluarsaattariaqartorpassuit ukiut amerlanngitsut ingerlanerini tamakkerlugit naammassineqassappata Kalaallit Nunaanni Namminersornerullutik Oqartussat ukioq 2017-ip tungaanut ukiut tamaasa 120 millioner kroninik aningaasaliissuteqartartariaqassapput.

Tamatumalu kingorna aningaasaliissutaasartut ukioq 2021-ip tungaanut ikilisikkiartuaarneqassapput.

– Mannali tikillugu iluarsaatassat ukiorpassuunngitsut ingerlanini naammassillugit suliarinissaannut naammattunik aningaasaliissuteqartarnissaq ajornarsimavoq, illoqarnermut attaveqarnermullu naalakkersuisoq Kim Kielsen inatsisartunut ilaasortamut Demokraatineersumut Marie Fleischerimut akissuteqarluni allappoq.

Sermitsiaq atuaruk...

Seneste nyheder / Nutaarsiassat kingulliit