Nuummi akit qaffasissorujussuit
Inissianik piginnittut nutaat illup tuniniarnerani akia akilertassavaat - tamanna Nuummik, Sisimiunik, Ilulissanik ilaannakortumillu Qaqortumik eqquivoq.
Namminersornerullutik Oqartussat kommunillu inissiaataat attartortittakkat tuniniarneqartarnerat pillugu inatsisartut peqqussutaat nutaaq ukiortaamiit atuutilerpoq.
Peqqussut pisoqaq nutaarlu aalajangiisuusumik assigiinngissuteqarput qangarsuarli innuttaasunik aalassatsitsisimasumik.
Peqqussummi pisoqqami inissiat tunineqartarput teknikkikkut-aningaasatigut naliliineq tunngavigalugu.
Tamatuma kingunerisaanik naalakkersuisunut ilaasortat atorfillillu Nuummi sulinermut atatillugu illuminnik akikitsuararsuanngorlugit pisisinnaasimapput.
Peqqussummi nutaami inissiat tuniniarneqarneranni nalingat malillugu tunineqartassapput.
Nuummi, Sisimiuni, Ilulissani ilaannakortumillu Qaqortumi inissiap tuniniarneqarnerani nalinga teknikkikkut-aningaasatigut naliliinermit qaffasinneruvoq.
Pingaartumik Nuummi inissiat tuniniarneqarneranni akii qaffasissorujussuupput.
Taamaattumik maanna attartortut inissiamut iluarsagassarujussuarmut kvadratmeterimut aki qaffasissorujussuaq akilersinnaavaat.
Assersuutissaavoq Qapiarfiusaaq, najugaqarfeqarfik pilerinartorujussuaq - toqqissisimanartoq illoqarfiulli qeqqanut qanittoq.
Najugaqarfeqarfik paarinerlugaq
Tuniniaanermi aki, Namminersornerullutik?Oqartussat illunik tuniniaasartunut attuumassuteqanngitsunut aalajangersartittagassaat, qaffasissuussaaq - immaqa allaat kvadratmeterimut 20.000 koruuniussalluni.
A/S Inissiaatileqatigiiffik INI-lli Qapiarfiusaaq imatut nalilerpaa:
– Ineqarfik aserfallassimasorujussuuvoq. Igalaat/matut illullu saqqaat aasimapput kiallu annertoorujussuaq aniasarpoq. Naatsorsuutigineqarpoq Qapiarfiusaami inissiat 8 aamma 12 procentiisa akornanniittut oqoqartut.
A/S Inissiaatileqatigiiffik INI inerniliivoq:
– Aningaasat atorfissaqartinneqartut naammannginnerat pissutigalugu aserfallatsaaliinermik pilersaaruterpassuit siunissamut sivisuumut kinguartinneqarsimapput.
Taamaattumik Qapiarfiusaaq nutartigassarujussuuvoq - imaqa allaat ukiualunnguit ingerlaneranni kvadratmeterimut 15.000 koruuninut.
Nutarterinissarlu tamanna attartortut, inissiaminnik piserusuttut, aamma eqqarsaatigissavaat.
Tassami tamakkua inissiamik piginnittutut nutarterineq akilissavaat.
Sermitsiaq atuaruk...