Siullermik itsarnisarsiuut - taavalu entreprenørit

Eqqissisimatitsinermut inatsisip nutaap kingunerisaanik sanaartortitsisut namminersortut aamma itsarnitsanik misissuinerni akiliisalissapput.

Erngup nukinganik nukissiorfimmik, aanna Nuup kujataani Utoqqarmiut Kangerluarsunnguanni, pilersitsinikkut tatsit nukissiorfimmut imermik pilersuisut sapusiorneqassapput erngat qaffallugu.

Qeqqani aluminiuliorfissarsuarmut atatillugu pinngortitami inissiiffiusinnaasut Nunatta Katersugaasivia 2007-imi 2008-milu ulorianartoqarneranik naliliiffigissavai.

Kommunit pingasut, Nuuk, Maniitsoq Sisimiullu, tamarmik suliffissuaqarfissap inissiiffissaanik pingasunik tikkuussisimapput, tamakkunani illorsuit saniatigut erngup nukinganik nukissiorfik, innaallagissap aqqutissai, aqquserngit umiarsualivillu pilersinneqassallutik.

Tatsini, erngup nukinganik nukissiorfimmut imermik pilersuisussani, erngup qummut killinga 10 meterinik qaffassaaq imeqarfimmut sapusiornikkut.

Taamaattumik itsarnisarsiuut inissiiffissatut tikkuarneqarsimasuni, sapusiornikkut erngup ataniilersussani, ilaatigut itsarnitsanik ujarlerput.

– Aluminiuliorfimmut atatillugu Qeqqani nunarujussuit pineqarput, siusinnerusukkut itsarnisarsiuunit misissuiffigineqarsimanngitsut, Nunatta Katersugaasiviani pisortap tullia Claus Andreasen Sermitsiamut oqarpoq.

Claus Andreasenip katersugaasivimmi itsarnitsanik sulineq aammalu Kalaallit Nunaanni eqqissisimatitsinermut inatsit akisussaaffigai.

Qeqqani erngup nukinganik nukissiorniffinnik pilersitsinissamut atatillugu itsarnitsanik ulorianartorsiornermut naliliineq 2007-imi aallartinneqarpoq 2008-milu naammassineqassalluni.

Qangarnitsanik eqqaassutissat ilisimaneqartut tamarmik, tatsinit sapusiukkanit ulinneqartinnagit, assanneqassappata qularnanngitsumik itsarnisarsiuut 35-40-t sæsonit marluk qaammatini marlunni-pingasuni ulapittariqassapput.

Taamaasilluni aluminiuliorfimmut atatillugu itsarnitsanik misissuineq Nunatta Katersugaasiviata suliarisartagaasa annersarissavaat.

Aasaq misissuineq sioqqullugu misissuinissap akissaa 20-25 millioner koruuninut nalilerneqarpoq, sanaartortitsisup akiligassaa.

Sermitsiaq atuaruk...

Powered by Labrador CMS