Malittarisassat sukanganerusut
Suliffeqarfiit anginerusut tamarmik ukiormannamiit nalilersortissavaat
Sulifeqarfiit qulinik taakkulu sinnerlugit amerlassusilinnik sulisullit tamarmik ukiormannamiit suliffeqarfimmi sulilluni avatangiisit qanoq innerat nalilersortalissavaat. Isumannaallisaanermut peqqissutsimulluunniit tunngasut tungaasigut ajornartorsiuteqarsimappat, suliffeqarfiit ajornartorsiutit qaangernissaannut pilersaarusiussapput.
Pilersaarusiornermi erseqqissaatigineqassapput suliffeqarfik qanoq nalilersuinersoq malittarisassallu sukanganerusut, Kalaallit Nunaanni sullivinni avatangiisit pillugit inatsisissatut nutaatut Folketingip 2005-imi akuersissutigisaannik tunngaveqartut qanoq sunniuteqassanersut.
Malittarisassat nutaat kingunerisaattut suliffeqarfiit erseqqissaatigisalissavaat soorlu assersuutigalugu værkestedimi nipiliortoqarpallaarluniluunniit pujoralaliortoqarpallaarnersoq, imaluunniit sulisut akornanni eqqarsartaatsikkut toqqissisimaqatigiinngitsoqarnersoq. Sullivinnillu nakkutilliisoqarfiup decemberimi suliffeqarfin nut ilitsersuusiarisaani allassimavoq, taamaattoqartillugu sulisitsisoq sulisut peqatigalugit iluarsiiniarnissamut pisussaaffeqartoq.
Naliliisalernikkut Sullivinnik Nakkutilliisoqarfiup malittarisassai allat, soorlu sanaartorfiit maskinallu ulorianartut isumannaatsuunissaannut tunngasut atuukkunnaarsinneqassanngillat. Naliliisalernissarli sullivimmi atukkat tamarmik ataatsimut naliliiffigineqartalernissaannik kinguneqassaaq.
Kalaallit Nunaanni Sulisitsisut Peqatigiiffiata (GA) malittarisassat nutaat qujarulluinnarpai.
– Tamakkununnga tunngasut aaqqissuuteqqissaarneqarnissaat iluaqutaasussatut isigaarput. Sulineq oqinnerulissaaq, naliliisalernissarlu suliffeqarfiit ajunngitsumik atorpassuk uagut isumarput malillugu suliffeqarfiit sullivinni avatangiisit pitsaasuunissaat akikinaarnerusalissavaat, GAp direktøria Henrik Leth oqarpoq.
– Pitsanngorsaatissalli suut akissaqartinneqartariaqarnissaat sulisut suliffeqarfiullu isumaqatigiissutigisinnaanngippatigit taava qanoq pisoqartassava?
– Tassami ataatsimiinnerni piumasaqaatinik siunnersuutinillu sulisitsisut akuersaarsinnaanngisaannik saqqummiussisoqartarumaarpoq. Tamarmilli naammagisimaarsinnaasaannik aaqqiissuteqarsinnaajumalluni isummanik naapeqatigiissitsiniartarnissaq pisariaqartarumaarpoq, Henrik Leth oqarpoq.
Sermitsiaq atuaruk...