Katersortarfik arlalinnik quleriilik

Teletårnet 2003-mi sanane­qarmat eqqarsaatigineqarsimavoq katersortarfiup isaternissaa biilinut inissiisarfimmut inissaqartitsiumalluni. Taamaariarmat katersortarfiup siulersuisui akerliliipput.

- Katersortarfik iniminiiginnassaaq, ukiuni 50-ini inigisimasamini, siulersuisut oqarput, ullumikkullu illup allineqarnissaa sulissutigilersimavaat.

- Paasisimavarput illuto­qaq nutarsarniarlugu iliuu­seqartariaqartugut piffimmut malinnaaqqullugu, illoqarfimmi illunik portusuulioqattaar­toqarnerani.

- Taamaattumik pilersaa­rutigaarput ininik quleriinnik arlalinnik qummut alliniarlugu, Katersortarfiup siulersuisuisa siulittaasuat Gunnar Petersen Nuuk Ugeavisimut oqarpoq.

- Pilersaarulli suli titartagaannaagallarpoq. Taamaattumik aamma ilisimaqqissaanngilarput illup allilernera qaqugu aallartikkumaarnersoq. Akerlianik allinissaanut aningaasanik katersilersimavugut. Taamaasiorpugut bingortitsisarnikkut, Gunnar Petersen oqarpoq.

Kalaalimerngit

Siulersuisut neriuutigaat innuttaasut katersortarfik ullumikkuminngarnit atornerusalissagaat.

Ilaatigut taamaasiortoqar­sinnaavoq maanna igaffiup allineratigut, tassani kalaaliminernik, maani illoqarfimmi amigaataasartunik, sassaallertoqartassalluni.

Aammattaaq illoqarfimmi amigaatigineqartorujussuupput peqatigiiffinnuut inissat, taamaattumillu katersortarfiup siulersuisuisa eqqarsaatigaat peqatigiiffiit katersortarfittaami nutaaliami inerpassuit ilaannik attartornis­saannik periarfissinnissaat.

Ullumikkut Illerfissarsiutileqatigiit Katersortarfimmi ilisinissamut aaqqissuisarfeqarput. Taamaasilluni peqatigiiffik taanna kisiartaavoq ullumikkut katersortarfimmi inimik attartortuni. Kiilerimi Gunnar Petersen Illerfissarsiutileqatigiit sinnerlugit illerfiliortarpoq, illoqarfimmi kikkunnit tamanit pisiarineqarsinnaasunik.

Nuuk Ugeavis atuaruk...