Kalaaleq tusaamasanut ilannguttoq
Angalatooq Ole Jørgen Hammeken New Yorkimi Explorers Club-imi ilaasortanngortinneqarpoq.
Ole Jørgen Hammeken, Uummannameersoq, New Yorkimi selskabimi nuimasuumi Explorers Clubimi ilaasortanngortinneqarpoq.
Klubbi nunarsuarmi misigisassarsiortartut klubbiisa tusaamasaanersaraat, kalaallillu ilaasortanngortitaq nunarsuarmi tusaamasat akornanniilerpoq, soorlu sir Edmund Hillary, 1953-imi siullersaalluni Mount Everestimik qaqisisoq.
- Explorers Club misigisassarsiortartut klubbiini tusaamasaanersaavoq tulluusimaaqaangalu nuannaajallaqalungalu klubbip taamak tusaamasaatigisup suliarisimasakka akuersaarmagit, Ole Jørgen Hammeken Sermitsiamut oqarpoq.
Ilisimasassarsiortartut annerpaat tusaamasaanerpaallu Explorers Clubimi ilaasortaasimallutilluunniit ilaasortaapput, klubbi taanna Kalaallit Nunaannut immikkut illuinnartumik attuumassuteqarluni. Tassami Issittumut Kalaallillu Nunaannut ilisimasassa 1904-mi klubbip pilersinneqarneranut pissutaammata.
Klubbip New Yorkip qeqqani qullersaqarfia sunik Kalaallit Nunaanneersorpassuarnik Issittumillu allaninngaanneersorpassuarnik peqarpoq kiisalu issittumut angalasartorpassuit tusaamasat assiutigalugit.
Amerikarmiu Robert E. Peary - avanersuarmiut Piulersuarmik taasagaat - soorunami initoorujussuuvoq, aammattaarli Knud Rasmussen aamma Peter Freuchen klubbip tusaamasanut saqqummersitsiviani nuimasuumik inissisimapput.
Knud Rasmussenimik inuusaliaq kiataannaq Pearymik inuusaliap kiataannaap sanianiippoq, klubbillu inerujussuani Peter Freuchenimik qalipagarujussuaq nivingavoq.
Sermitsiaq atuaruk...