Atuarfimmi aserorterineq annertooq
Nuussuup Atuarfia annertuumik aserorteriffigineqaqattaarpoq. Igalaat katillugit 34-it aserorterneqarput, klasseværelsit katillugit arfinillit iserfigineqarlutik taakku-nannga tallimat aserorteriffigineqarput, atuarfiup matui silarliit heksehylinik putoorneqarput graffittinillu allattuiffigineqarlutik.
Aammattaaq atuarfiup inersuaa iserfigineqaqattaarpoq ikuallariarneqarlunilu. Naasuusat igalaallu saaguat rensebenzinamik kuerarsinnarlugit ikeriaraluarneqarput, qujanartumik naasuusat aaginnarlutik, atuarfiup pisortaa Janne Kleist Lynerth oqaluttuarpoq.
Aserorterinerit pipput ulluni 25., 26., 30. aamma 31. december 2007 kiisalu 1., 2. aamma 3. januar 2008.
Aserorterinerit aningaasatigut nalingat paasiniarneqassaaq, kikkullu aserorterisimanersut politiinit paasiniarneqarpoq.
- Nuussuup Atuarfiata eqqaa meerarpassuarnit inuussuttuaqqanillu unnukkut najorneqartarpoq oqqiffigineqarluni. Angajoqqaat nunaqqataasullu kajumissaarpavut meerartatik inuusuttortatillu oqaaqqissaaqqullugit atuarfiit matoreeraangata ingalassimaniartaqqullugit, taamatullu aamma angajoqqaat unnukkut meeqqaminnik biiliussillutik atuarfiup eqqaanukaassisartut qinnuigissavagut tamanna u-nitseqqullugu, atuarfiup pisortaa kajumissaarivoq.
Aserortereqattaarnerit kingunerisaannik atuartorpassuit toqqissisimanngillat, isiginnittut oqaaseqarunik unatarneqarnissamik qunusaarneqartarsimammata. Taamaattumik angajoqqaat qanigisaasullu tamaasa meerartaminnik oqaloqateqarluarnissaannik atuarfimmiit kaammattorneqarput.