Inaallagissamut, imermut kiassarnermullu akit nutaat
Iloqarfinni qulingiluani nunaqarfinnilu arfineq-pingasuni innaallagiaq akikillissaaq, nunaqarfinnili amerlanerni ukiumut 1200 kr.-it angullugit akilinerusalissapput.
Aki qaffasinnerpaasussaq annertunerpaamik allanngorpoq. Illoqarfinni Kangaatsiami Ittoqqortoormiinilu kiisalu nunami tamarmi nunaqarfinni innuttaasut ukiumi 2007-imi kWh-imut 3,15 kruuninik akiliisariarlutik ukiortaaq 2008’miit kWh-imut 3,52 kruuninik akiliisalissapput.
Assersuutigalugu ilaqutariit ukiumut 3.500 kWh-inik atuisarunik akillu qaffasinnerpaaffisaanniittumi ukiumi 2007-mi najugaqartut, 2008-mi katillugit 1.260 kruuninik ukiumut akiliinerusalissapput innaallagissamik atuinerat allanngorsimassanngippat.
Illoqarfinni Qaqortumi, Narsami, Maniitsumi, Aasianni, Qasigiannguani, Ilulissani, Qeqertarsuarni, Qaanaami Tasiilamilu kiisalu nunaqarfinni Niaqornaarsunni, Qeqertani, Saqqami, Ikerasammi, Saattuni, Kullorsuarmi, Innaarsunni Kuummiinilu innuttaasut akitigut appaavigineqassapput.
Nuummi nunaqarfinnilu Tasiusami Kuummiinilu innaallagissamut akit appasinnerpaaffiat akilertassavaat. Taannalu januaarip aallaqqaataani 2008 kWh-imut 1,44 kruuneqarpoq.
Imermut 1.000 literimut akit qaffasinnerpaaffissaat 2007-imi 27,91 kruuninik naleqartoq, januaarip aallaqqaataani 2008-mi, 31,97 kruuninut qaffappoq. Aki qaffasinnerpaaq illoqarfinni nunaqarfinnilu tamangajanni atuuppoq taamaallaat Qaqortumi, Paamiuni, Nuummi, Sisimiuni, Aasianni Ilulissanilu kisimi pinnani.
Akit qaffannerat aalisakkerivinnut imermik tunisisarnerup appariarujussuarneranik peqquteqarpoq, kiisalu sumiiffiit ilaanni tunisassiuutinut aningaasartuutit qaffannerannik.
Kiassarnermut akit suli assigiipput. 2007-imi apriilip aallaqqaataani uuliap akiata apparsimaneranik peqquteqartumik akit annikitsumik appartinneqarsimapput.
Kiassarnermut ataavartumut qaminneqarsinnaasumullu akit 2 % missaanni appariarput.
Innaallagiaq atorlugu kiassarnermut, Nuummi taamaallaat atorneqartumut, akit annikitsumik aamma appartinneqarput. Kiassarnermut ataavartumut akit 2 %-ingajammik apparput kiassarnermullu qaminneqarsinnaasumut 4 %-ingajammik apparlutik.
Innaallagissap erngullu assigiimmik akeqartussaanerisa akinut naleqqunnerusunut allanngortinneqarnissaannut aaqqissuusigallarnermik kiisalu uuliap akiata allanngorneranik akinut allannguineq annerusumik peqquteqartoq Nukissiorfiit ilisimatitsipput.