Pisortanngortussat MBA-mik ilinniartut

Kalaallit pisortassatut piukkunnaatillit qulit februarip naanerani tuluit pigisaanni Henley Management Collegemi MBA-mik ilinniarlutik aallartissapput.

Kalaallit pisortat ilinniaqatigiissussat aappassaat Henleysimi MBA-mik ilinniarlutik aallartittussanngorput, ilinniaqatigiittussanilli pissarsiniarneq ajornakusoorsimavoq, Henley Management Collegemi direktøri Leif Bergmann taama ilisimatitsivoq.

– Kalaallit Nunaanni tusagassiuutitigut atuarneqarsinnaasutut kalaallit qaffasissumik ilinniagaqartarnissaat sukataarunneqarpoq, tassanilu Henleyp pisortassanik nunani tamaneersunik ilinniartitsisarnera soqutigineqalersimavoq, Leif Bergmann oqarpoq.

Kalaallit pisortassatut ilinnialersussat qulit ilinniarnissartik aallarnerlugu februarip naanerani Tuluit Nunaanni Henleyliaqatigiissapput.

Tassani »pisortatut eqqarsarneq« sammineqassaaq, ilinniarnertilli Kalaallit Nunaanniiginnarlutik ingerlatissavaat. Ukiumut ataasiaannarlutik ilinniarfimmukartarlutik ilinniagassat sinneri allat tamaasa angerlarsimaffimminniiginnarlutik mail-illut internettikkullu ingerlatassavaat Henley-imi professorinit tikeraarfigineqartaannarlutik.

Leif Bergmannip tuluit professorit Kalaallit Nunaannut tikeraarniutiinnavittarnerarpai. Ilinniartitsisut pikkorissorsuit silarsuarmut angalasarnermik sungiussilluarsimasuugaluarlutik Kalaallit Nunaat suli alutornarluinnartutut isigigamikku.

Ilinnialersussat namminersortut pisortallu suliffiutaanneersuullutillu namminersornerullutik oqartussaneersuupput. Namminersornerullutilli oqartussat suliffeqarfiutaasa angineri ilaasa Henley massakkut nakerinngikkallarpaat.

Kalaallit MBA-mi ilinniartut siulliit januar 2006-imi aallartipput, soqutiginnilluartullu 14-it taakkua ilinniarnertik pilersaarutit malillugit ukiup matuma ingerlanerani naammassissavaat.

Ilinniarneq ingerlalluarsimavoq; ilinniagaqartullu amerlanersaat ilinniarnermik ingerlanerani atorfimminni qaffatsinneqarsimapput.