Ilinniagaqarnersiutit marloriaatinngorput
Ilinniagaqarnersiutit nutaat ukiortaamiit atuutilerput. Ilinniarnertuunngorniarfimmi iinniartunut angajoqqaaminni najugaqartunut 18-ileereersimasunullu ilinniagaqarnersiutit marloriaatinngorput.
Ilinniagaqarnersiutinut malittarisassat nutaat 1. januar 2008-mi atuutilerput. Ilinniarnertuunngorniarfimmi ilinniartut angajoqqaaminni najugaqartut ilinniagaqarnersiutaat qaammammut 2.400 koruuninik amerlipput.
Ilinniagaqarnersiutinut malittarisassatoqqat ilinniarnertuunngorniarfimmi ilinniartunik angajoqqaaminni najugaqartumik ilinniartunillu namminneq najugaqartunik assigiinngisitsisimapput.
Ilinniagaqarnersiutinulli malittarisassatigut nutaatigut ilinniarnertuunngorniarfimmi ilinniartunut 18-ileereersimasunut tamanut ilinniagaqarnersiutit siunissami assigiilissapput. Ilinniarnertuunngorniarfimmi ilinniartut 18-ileereersimasut qaammammut 4.500 koruuninnattassapput. Ilinniagaqartut 18-it inorlugit ukiulillit qaammammut 2.100 koruunisisassapput.
Ilinniagaqarnersiutit qaammammut kingumoortumik tunniunneqartarput. Tamatuma kingunerisaanik ilinniagaqartut ilinniagaqarnersiutit allanngornerat aatsaat iluamik malugissavaat februarimi ilinniagaqarnersiutit tigugunikkit.