Inatsisartut allattoqarfiat: Mamarliineq

Inatsisartut Siulittaasuat Jonathan Motzfeldt unnerluutiginninnernut atatillugu killisiorneqarsimanngilaq, pisortaq Nikolaj Sørensen oqarpoq.

Sermitsiami ullumi saqqummersumi allaaserineqarpoq politikereq nuimasoq Namminersornerullutillu Oqartussat suliffeqarfiisa ilaanni atorfilik politiinut unnerluutigineqarsimasut

Allaaserisamut tunngatillugu Inatsisartut allattoqarfianni pisortaq Nikolaj Sørensen tusagassiuutitigut nalunaaruteqarpoq.

– Apriilip qaammataani 2007-mi Inatsisartut Siulittaasuata angerlarsimaffiani ataatsimuualaarnermi kingornalu Inatsisartut Allattoqarfianni sulisorisap misigisaminut tunngatillugu eqqaamasaminik qullersaminut saaffiginnissutaanut Sermitsiami oqaluttuareqqinneqartut piffissaq eqqarsaatigalugu assingusorinarput.

– Nunatsinni politikerimik nuimasumik unnerluutiginnissimanertut oqaatigineqartumut tunngatillugu isumaliutersuutigineqarsinnaasut illua tungilerumallugit tusatsiakkanik pisariaqanngitsumik pilersoqannginnissaa Inatsisartut Allattoqarfiata pisariaqartutut isigaa, NIkolaj Sørensen allappoq.

– Tassunga atasumik Inatsisartut Allattoqarfiata uppernasssassavaa 2007-mi apriilip qaammattaani IMAK-ip ataatsimeersuartitsineranut atasumik Katuami nerersuartoqareersoq Inatsisartut Siulittaasuata angerlarsimaffiani nalliuttorsiorneq inuinnartut ”nanginneqarsimasoq”. Sulinermut atatillugu ataatsimiittoqarsimanngilaq, qaaqqusatullu peqataasut immikkut qaaaqqunagit nalliuttorsiualaarneq angerlarsimaffimmi nanginneqarsimasoq pineqarluni.

– Inatsisartut Siulittaasuata Jonathan Motzfeldtip Sermitsiami ilanngussami oqaatigineqartutut ingerlasoqarsimanera ilisarisinnaanngilaa, unnuarlu taanna nalliuttorsiornerup nanginneqarnerani peqataasut akornanni naapertuutsinngitsumik pisoqarsimanngitsoq.

– Angerlarsimaffimmi naapisimaarnerup kingorna qaammatit arfineq pingasut missaat qaangiuttut nalliuttorsiualaarnermi peqataasut ilaat arlallit erseqqissumik nassuiaasernagu unnerluussissummik tunniussisoqassappat tamanna mamarliiniarnertut isumaqarfigisariaqarpoq, Nikolaj Sørensen allappoq.

– Unnerluutiginninnertut oqaatigineqartunut atatillugu Inatsisartut Siulittaasuat eqqartuussassanngortinneqarsimanngimmat oqaatigineqassaaq, soorluttaaq Inatsisartut Siulittaasuat unnerluutiginninnernut atatillugu killisiorneqarsimanngitsoq. Tassunga atatillugu eqqumiigisariaqarpoq suliassamik misissiunissamik politiit tunngavilersuutaannik Sermitsiaq allaasserinninnermini oqaaseqarsimanngimmat.

– Sermitsiami ilanngussami oqaatigineqartutut pisoqarsimaneraanerit eqqartuussivikkoortumik inaarutaasumik aalajangiivigineqartinnagit Inatsisartut Siulittaasuannit Inatsisartulluunniit Allattoqarfiannit oqaaseqarfiginiarneqanngillat, Nikolaj Sørensen allappoq.

Powered by Labrador CMS