Dash 7 assakaasuminik qaartoorpoq

Air Greenland-ip timmisartuussinissaq allannguallatsittariaqarsimavaa sisamanngorneq januarip 17-iat timmisartut ilaat teknikkikkut ajoquteqalermat.

– Tupinnartoqanngilaq Dash 7-ip assakaasuminik qaartoorsinnaanera. Tamanna ukiumut ataasianngikkuni marloriarluni pisarpoq. Taamaattumiguna niului tamarmik marlunnik assakaasoqartut, taama Sermitsiamut oqarpoq Air Greenland-imi timmisartuussinermut pisortaq Jørgen Erik Andersen.

Assakaasumik qaartoorneq pivoq Aasianni pingasunngorneq januarip 16-iat Ilulissaniillu assakaasumik nutaamik aggiussisoqarpoq. Aammali paasineqarpoq timmisartoq allamik ajoquteqalersimasoq.

– Timmisartup motoria ataaseq ajoquteqalersimavoq kingornalu paasivarput ajoqutaasoq ima annertutigisoq motori tamarmik taarserneqartariaqarluni. Ilimagaarput timmisartoq piareersinnaajumaartoq sisamanngornermi ualinerani, taama Jørgen Erik Andersen oqarpoq.

Powered by Labrador CMS