KNR (nutaanik) siulersuisoqanngitsoq

Ukiup nutaap aallartinnerani naalakkersuisut suli siulersuisussanik nutaanik tikkuasimanngillat

KNR januarip aallaqqaataaniili siulersuisunik aqutsisoqarani ingerlasimavoq.

Siulersuisutoqqat Juaaka Lyberthimit siulittaasuuffigineqartut 2007-ip naanerani tunuarnikuupput. Pilersaarutit malilluinnarlugit. Nunatsinni tusagassiorfiit annersaannut akisussaasuusussanik siulersuisussanik nutaanik suli tikkuaasoqarsimanngilaq.

KIIIP-ip kattuffiit suliffeqarfiillu KNR-imilu sulisut siulersuisuni sinniisussaminnik inassuteqartussat sapaatip akunnerani kingullermi aatsaat allagaqarfigai. Taakkulu januarip 25-iannut piffissalerneqarsimapput. Tamatumalu kingorna naalakkersuisut siulersuisussanik inuttalersuissapput.

KIIIP-imi pisortap tulliata Anja Jochimsenip KNR-ip siulersuisuinut tunngasut taamaannerat taamatut Sermitsiamut uppernarsarpaa.

– Ilumoorpoq siulersuisuusimasut kingullermeerlutik ataatsimeereernikuummata. Juullertinnagulu siulersuisunik nutaassanik tikkuaanissaq angumerisinnaasimanngilarput, Anja Jochimsen oparpoq.

Siulersuisunik nutaassanik tikkuaajumaataarneq siulersuisuusimasut ukiumoortumik naatsorsuutit akuerineqarnissaat pillugu 2008-ni ilanngullugu ingerlaannarnissaannik aperineqarsimanerannik peqquteqarnerarpaa.

Taamaattoqarsinnaannginnerali Namminersornerullutik Oqartussani inatsisilerituut juullilivinnerani aalajangiuppaat. Taamaattumillu januari aallartereersoq aatsaat suliniartoqarsinnaalersimavoq.

Powered by Labrador CMS