KNTIS-ip Ilulissani ilisimasanik eqiteruffeqalernissaq tikilluaqquaa
Ilulissani Ilisimasanik Eqiteruffeqalernissaanik isumassarsiaq Kalaallit Nunaanni Takornaiaqarnermut Inuussutissarsiornermullu Siunnersuisoqatigiit assorsuaq tikilluaqquaat.
KNTIS-imi pisortaanerup Thomas Rosenkrands-ip Kalaallit Nunaat Avannaa Ilisimasanik Eqiteruffissaanik pilluaqquaa, suleqatigiinnissarlu qilanaaralugu.
- Inerititaqarluartumik suleqatigiinnissarput qilanaaraarput, taamalu Kalaallit Nunaata Avannaani nunap immikkoortortaani inuussutissarsiornikkut ineriartorttitsinissamut Ilulissani Ilisimasanik Eqiteruffillu qanimut suleqatigiissinnaajumarnissarput naatsorsuutigalugu. Nunap immikkortortaannut siammarterineq ilutigalugu KNTIS-ip nuna tamakkerlugu sullissineq, nunat tamat akornanni suliniutinik suleqatigiinnerit, avammut nioqquteqarnermik siuarsaanerit assigisaallu annermik sammisinnaalissavai, Thomas Rosenkrands oqarpoq.
- Ilulissani Inussutissarsiornermut Siunnersuisooqatigiit siulittaasuat Ole Dorph isumaqatigilluinnarparput, Kalaallit Nunaata Avannaani aatsitassanik uuliamillu qalluilernerit aallartissagaluarpata aasimmiaa kingusinaarpugumik oqarneranut tunngatillugu. Tassunga atatillugu Ilisimasani Eqiteruffik nunap immikkoortortaani aalajangersimasumik inissisimasoq assorujussuaq iluaqutaassaaq, Thomas Rosenkrands oqarpoq.
- Qularutiginngilarput Ilisimasanik Eqiterussivik taanna nunap immikkoortuani takussaalluarnermigut sunniuteqarluarsinnaalissaasoq, soorlumi KNTIS inuussutissarsiornermut ineriartortitsiviup takornariaqarnermullu ineriartortitsinissaq ataatsimoortinneqarpa taamatut pitsaalluinnartumik misigisaqarsimasoq. Taamaattumik qularutiginngilluinnarparput, nunap immikkoortuini ilisimasanik eqitserussivinnik taamaattunik pilersitsinikkut nukiit taakku atorlugit nunap immikkoortuini nunalu tamakkerlugu pissarsiassat annertunerusinnaasut.
- Uagut ineriartortitsinermut siunnersortivut soorunami nunap immikkoortuini ineriartortitsinermut suleqataalluartussaassapput, peqatigitillugulu taakku suliatik takornariaqarnermik inuussutissarsiornerimmilu nunamut tamarmut saaminerusut aallutilissallugit. Taamaattumik aamma taakku sisamat siunissamik KNTIS-ip qitiusumik allaffeqarfia aallaavigalugu angalasartussaassapput.
- Piginnaaneqarfitta nunap immikkoortortaannut ingerlateqqinneqarnissaanik suliagut ingerlatiinnassavagut, soorlu ullumikut siunnersortit kommunip ataani inissisimasut piginnaaneqarfikut ineriartortitsinitsinni ullumikkut pisartoq, aallarnisaasunut siunnersuinermik uagut ullumikkut siunnersueriaatsitsitut piginnaasinnaalerlutik, Thomas Rosenkrands oqarpoq, nangillunilu:
- Aamma Ilisimasanik Eqiterussivissap misilittakkat aallarnisaasunut siunnersuinermut atatillugu KNTIS-ip ukiut pingasut ingerlaneranni misilittagai atorluarniarsinnaassavai. Taamaattumik Ilisimassanik Eqiterussivissami sulisunngorumaartussat suleqatigilernissaannut soorunami soqutiginnippugut, tassami ataatsimoorluni aatsaat ilisimasanik annertusiartortitsinikkut inuussutissarsiutitigut ineriartortitsineq pisariaqartoq qularnaarneqarsinnaavoq, Thomas Rosenkrands erseqissaavoq.