Utaqqisuni normu qassi?
Maanna internetikkut takusinnaalerpat inissarsiortut akornanni normu qassiunerlutit.
Nunatsinni illoqarfinni anginerusuni inissiamik nalinginnaasumik attartorniarnermi ukiut arlaqartut utaqqisoqartariaqartarpoq, taamaattumillu utaqqisut allattorsmaffianni inissisimaneq annertuumik eqqumaffigineqarluni.
www.ini.gl atuutilersinnerani, siunissami imminut kiffartuussinnaanissamut atortut nittartakaamut ilanngussornissaat, INIp qulaajarpaa. Utaqqisut allattorsimaffianni inissisimanerit takutissinnaaneri imminut kiffartuussinnaanermi alloriarninnguuvoq siulleq, kisianni periarfissat amerlinissaat qularnanngilaq.
E-mail imaluunniit SMS atorlugit inissianik neqerooruteqarsinnaalernissarput maannakkut sulissutigaarput, taamaattumik nammineq e-mailerisat imaluunniit mobilivit normua tassa maannamit nalunaarutigissallugu iluaqutaasinnaavoq.