Avatangiisinut sunniutigisinnaasai tusarniaassutigineqalerput
Pilersaarusiornermut atatillugu avatangiisinik nalilersuinermik nalunaarusiami, kikkunnut tamanut tusarniaassutigineqalersumi, alumiiniliorfimmik pilersitsisoqassappat avatangiisinut sunniutigisinnaasai sammineqarput.
Nunap immikkoortua pineqartoq Sisimiut avannaaniit Nuup kujataanut isorartussuseqarpoq. Misissuinerit aallarnersaataasut 2006-imi decemberimiilli ingerlanneqarput.
Kikkunnut tamanut tusarniaanermut atatillugu pilersaarutaavoq 2008-mi sapaatip akunnerini 2 aamma 3-mi kommunini pineqartuni, tassaasut Sisimiut, Maniitsoq aamma Nuuk, innuttaasunik ataatsimiisitsinerit arlaqartut ingerlanneqarnissaat.
Inatsisartut upernaarmanna ataatsimiinneranni ”Kalaallit Nunaanni suliffissuit nukinnik annertuumik pisariaqartitsisut pillugit nassuiaat” alumiiniuliorfimmik pilersitsisinnaanermut tunngassuteqartoq Inatsisartunit akuersaartumik tiguneqarpoq.
Nassuiaatip innersuussutaasa ilaagaat suliniutip aallartitinneqarnissaa pillugu aammalumi alumiiniumik aatsiteriviup inissiffissaa pillugu inaarutaasumik aalajangiisoqartinnagu pilersaarusiornermut atatillugu avatangiisit nalilersuiffigeqqaarneqassasut. Maanna kikkunnut tamanut tusarniaassutigineqarlersoq tassaavoq pilersaarusiornermut atatillugu avatangiisit nalilersornerannik suliaq taanna.