Tasiilami juullilernerani skakerneq
Skakklbuip juullilernerani unammisitsinerani meeqqat inuusuttullu 20 peqataapput.
Tasiilami skakklubi Skakklubben Arpattoq ukiut pingajussaa tulleriisiinnarlugit illoqarfiup meerartaannut inuusuttaannullu juullilernerani unammisitsisimavoq.
– Ukioq manna meeqqat inuusuttullu 20-it ujamittaassat akissarsiassallu unammisaqattaarutigaat, skakklubimi siulittaasup tullia Holger Amelung Sermitsiaq.gl-imut oqaluttuarpoq.
Ukioqatigiikkuutani assigiinngitsuni pulje-nut pingasunngorlugit unammisaqattaarput, ajugaasullu pingasut tassapput Lea Iignatiussen, Harald Singertat aamma Aqqalu Larsen.
Peqataasut tamarmik diplominnatsinneqarput, puljenilu pingasuni angusarinnerpaat pingasut kioskimut atuagaarniarfimmullu Neriusaamut pisiniarsinnaanermut gavekortisipput-
Skakklubi 2005-imi ukiakkut islandimiut skakertartut peqatigiiffiannit ikiorneqarluni Nunafond-imillu aningaasaliiffigineqarluni aallartimmalli juullilernerani påskillu nalaani unammiuaartarnerit ileqqunngorsimapput.
Skakklubi ataasinngornerit tamaasa Tasiilami atuarfimmi Alivarpik-mi ukiuunerani skakertitsisarpoq.
Skakklubip siunertaraa ukiumi taartalernerani illoqarfiup meerartaasa inuusuttaasalu nuannersumik ineriartornartumillu ataatsimoorfeqarlutik aliikkutassaqarnissaat.
Tasiilami skakklubi aamma niyttartakkami http://skak.tasiilaq.net-imi alakkarneqarsinnaavoq.