Lektori: Kalaallisut pikkorissartitsinerit naammanngillat

Ilisimatusarfimmi lektorip kissaatiginartippaa Danmarkip Kalaallillu Nunaata suleqatigiinnissaat, taamaasilluni qallunaat Kalaallit Nunaaliartut oqaatsinik ilinniartinneqarsinnaaqqullugit.

Ilisimatusarfimmi lektori Birgitte Jakobsen oqarpoq qallunaanut kalaallit oqaasiinik ilinniarusuttunut naammattunik neqerooruteqanngitsoq, qallunaallu oqaatsit ilinniarnissaannut pitsaasumik kajumissuseqassasut, maanna kalaalinngorsaanerup aallartisalerneqarnerani.

- Imaassanngilaq inuit kalaallisut oqalussinnaanngitsut niaquisigut anaartarlugit pinngitsaalineqassasut oqaatsinik ilinniaqqullugit. Pitsaasumik kajumissuseqassapput, tamannalu kalaallit qallunaallu ataatsimut suliniutigissavaat, Birgitte Jakobsen radioavisimut oqarpoq.

Taanna isumaqarpoq ilinniartitsisunut, pikkorissarnernut atuartitsinermilu atortunut atugassat kalaallinit pingaartinneqassasut, qallunaallu tungaannit nassuerutigineqassasoq oqaatsit ilinniarnissaat pisariaqartoq.

Birgitte Jacobsen eskimologi-mik oqaatsinillu ilisimatusarnermik ilinniarsimavoq ukiunilu 15-ini Kalaallit Nunaanni najugaqarsimalluni.

Powered by Labrador CMS