Japanimiut tv-liortartui Nuummiittut
Japanimiut tv-liortartui suleqatigiit maannakkorpiaq Nuummiipput, kalaallit nerisassaataat D-vitamin-illu sunniutigisartagai pillugit immiussiartorlutik.
Japanimiut tv-liorfiutileqatigiiffiat NHK Kalaallit Nunaanniippoq, d-vitamini pingaarnertut sammiartorlugu. Tv-liortartut ilaatigut nakorsaaneq Gert Mulvad D-vitamini pillugu ilsimatusarsimasoq apersorpaat.
–Kalaallit nerisassaataannik nerisaqarnerup qanoq isumaqarnera pillugu miisissuisimavugut, europamiullu nerisaannut nuukkaanni qanoq pisoqartarnersoq, Nuummi nakorsiartarfimmi nakorsaaneq Gert Mulvad oqarpoq.
Misissuineq ukiualunnguit matuma siornagut Nuummi ingerlanneqarpoq. Inuit assigiinngitsunik nerisaqartartut misissuiffigineqarput, inuit europamiut nerisassaataannik nerisaqarnerusut aamma allat kalaaliminertornerusartut.
– Tamatumani immikkut takuneqarsinnaavoq, D-vitamininik amigaateqalersarneq annermik ukiukkut europamiut nerisassaataannik nerisaqarnerunerup nalaani pisartoq, Gert Mulvad oqarpoq.
Illuatungaatigut kalaallit qangaaniilli nerisarisartagaasa D-vitamininik pisariaqartitsineq tamakkiisumik matussusertaraa. Pingaartumik puisit aalisakkallu pualasuut D-vitamineqarluarput.
D-vitaminit aamma seqernup qinngornerinit UV-strålenit pisumik ammimi pilersinneqartarput. Kisianni seqineq Kalaallit Nunaanni pukkilisimaaleraangat D-vitamininik pilersuineq annikillisarpoq.
Tv-liortartut D-vitamini pillugu immiussaat qaammatialunnguit qaangiuppata japanimiut tv-atigut takutinneqassapput.