Politiit suliffimminnik naammagisimaarinnittut
Politiit suliffimminnik naammagisimaarinnittut amerliallalaarsimapput, politiit nammineq iluminni naammaginninneq pillugu misissuisitsisimanerisa tamanna takutippaa.
Politiit misissuinermi politiit suliaasa iluini assigiinngitsut sisamat akornanni 1-imiit 4-mut karakteriliisussaasimapput, kisitsisillu taakku ukiup siulianut sanilliunneqarsimallutik.
Danmarkimi naammagisimaarinninneq siulianut sanilliullugu malunnartumik annikilleriarsimavoq, tamannalu politiit kattuffianni siulittaasup tullia Peer Withagen naaperorlugu peqquteqarpoq, politeeqarnermut aaqqissuussaanerup ukioq manna atuutilersumik nutarterneqarnera. Naammagisimaarinninneq taamaallaat Bornholmimi Kalaallit Nunaannilu qaffarialaarsimavoq.
- Uani maluginiagassaavoq nunami immikkoortortanut allanutsanilliullugit taakku tassaammata nunap immikkoortortaat nutarterinermit annertunerusumik eqqorneqarsimanngitsut, Peer Withagen Ritzau-imut oqarpoq.
Politeeqarnermut aaqqissuussaaneq 2007-imi jannuaarip 1-iani atuutilerpoq, taamanikkut nunap immikkoortortaani politeeqarfiit 54-it immikkoortortaqarfissuarnut 12-inut Savalimmiunut Kalaallit Nunaannullu nutarterneqarput. Politiit suliaat annertoorujussuarmik eqiterunneqarsimapput, najukkani politeeqarfinniit qitiusumik eqiteruffissuarnut nussorneqarsimallutik, tamakkulu politiinut tamanut ulluinnarni annertuumik allannguutaasimapput.